Den un investigacion di Cuerpo Policial Aruba, un total di diesun persona a keda deteni desde siman pasa diahuebs riba sospecho di menaza y/of instigacion riba Facebook. E menazanan y instagacionnan aki tabata dirigi contra polis.
Ministerio Publico sa cu e incidente di tiramento cu a tuma lugar riba 9 di februari 2025, den cual un hoben a bin na fayece, a causa emocionnan grandi den comunidad. Sinembargo, esaki no por hiba hende na cuminza comete hechonan castigable.
Libertad di expresion ta un di e principionan di Estado di Derecho. Den un Estado di Derecho ta permiti pa personanan expresa opinionnan cu otronan por sinti como insulto. Sinembargo, libertad di expresion no ta sin su limite. Codico Penal ta demarca e limitenan di libertad di expresion. Cu otro palabra: libertad di expresion ta stop unda ley penal ta start.
Comete hechonan castigable no ta cay bao libertad di expresion.
Menaza hende of expresa na un manera menazante ta un hecho castigable. Instiga otronan pa nan comete hechonan castigable (opruiing) ta un hecho castigable. Pone textonan menazante of instigante riba social media manera Facebook ta un hecho castigable.
E personanan cu a wordo deteni awor ta wordo sospecha di e comete e hechonan aki, caminda e textonan menazante tabata dirigi riba polis. Esaki lo no wordo tolera na ningun forma.
E investigacion di e incidente di 9 di februari 2025 dor di Landsrecherche ta keto bay andando.
E polisnan a wordo scucha como sospechoso den e investigacion. Polisnan cu haci uso di nan arma den tempo di trabou no ta wordo deteni en principio, mientras ta spera riba e resultadonan final di e investigacion hiba pa Landsrecherche, ya cu segun ley, nan por usa e arma di servicio bao cierto condicionnan. E investigacion mester determina si nan a cumpli cu e condicionnan aki. Ey ta mira tambe e diferencia cu civilnan.
