Willemstad – Den combersacionnan recien cu Gobierno di Corsou, Colegio di supervision financiero Corsou y Sint Maarten (Cft) a insisti cu mester atende e problemanan cerca Servicio di Impuesto di Corsou mas pronto posibel. Desde 2021, e ingresonan di impuesto ta mustra un aumento, entre otro pa motibo di e medidanan di compliance cu ta tuma desde e tempo ey. Sin embargo, tambe tin problemanan persistente. Un Servicio di Impuesto profesional y honesto ta di importancia crucial pa por mantene e resultadonan positivo.
Desde e dia cu el a asumi su cargo, na 2021, Minister di Finanzas di Corsou ta traha riba mehoracion di e compliance tributario. Durante bishitanan na Servicio di Impuesto y Stichting Belastingaccountantsbureau, Cft a combersa tocante di e accionnan di mehora den e marco di e trayecto aki. A pesar cu a logra resultadonan positivo, mas profesionalisacion di Servicio di Impuesto ta necesario pa mantene y expande e resultadonan aki.
Reorganisacion Servicio di Impuesto
Na 2024, investigacion di Stichting Overheidsaccountantsbureau a demostra cu den e implementacion di legislacion tributario, tawata tin casonan di tratamento preferencial indebido di parti di Ontvanger. Ademas a constata cu no ta cumpliendo cu e marconan legal. Esaki ta afecta e confianza den Servicio di Impuesto, y ademas e ta trece riesgonan pa e moralidad tributario. Tin plannan avansa pa reorganisa y modernisa Servicio di Impuesto. Cft a urgi Conseho di Minister pa priorisa e reorganisacion aki mas tanto posibel, pasobra un Servicio di Impuesto honesto y transparente ta contribui na e salud financiero di Corsou. Den e marco aki, Cft tambe a pidi atencion pa e reforma di e sistema tributario. Akinan tambe tin oportunidadnan pa mehora compliance, y di e manera ey, aumenta e ingresonan. Asina ta crea posibilidadnan pa por baha e presion tributario alto na Corsou.
Presupuesto 2025
Corsou ta presenta surplusnan presupuestario multianual, principalmente pa motibo di e aumento den e ingresonan di impuesto. E pais tambe ta haciendo progreso den e otorgamento di licencianan na proveedornan di weganan di azar online. Di e manera aki ta crea espacio pa implementa reformanan sumamente anticipa, por ehemplo den cuido y seguridad social. E reformanan aki lo beneficia tur ciudadano di Corsou. Den e marco aki, Cft tambe a pidi atencion pa e elaboracion mas detaya di e solucion pa e problematica financiero di Curaçao Medical Center.
