Loke sea Mike Eman kier introduci extra ta ministernan extra sin autoridad mara den ley
ORANJESTAD– Dialuna despues di su reunion cu SE Gobernador di Aruba, Señor Alfonso Boekhoudt, Prome Minister Evelyn Wever-Croes a duna varios declaracion riba diferente topico contestando preguntanan den un entrevista cu nos planta nacional TeleAruba. Un di e preguntanan ricibi ta tocante e topico cu a surgi diadomingo tocante ‘staatssecretaris’. Prome Minister a indica di a tuma nota di esaki y a splica cu Hulanda si conoce e instituto di staatssecretaris.
E staatssecretaris ta na banda di e minister encarga cu cierto cartera y na momento cu e cartera di e minister bira mucho pisa, ta delega e trabounan na e staatssecretaris. Manera ta e caso di e Minister di Relacionnan di Reino y su Secretario di Estadio di Relacionnan di Reino. Aruba ta deal direct cu e Secretario di Estado di Relacionnan di Reino y no cu e Minister di Relacionnan di Reino. Na Hulanda, Prome Minister a sigui splica, cu staatssecretaris ta un posicion politico mescos cu e minister apunta door di Parlamento y cu pa medio di un mocion di desconfiansa por kit’e tambe.
Na Aruba, nos no conoce e posicion di staatssecretaris den nos sistema di gobernacion y no ta hancra den nos leynan. Den nos leynan tin un referencia na e palabra ‘staatssecretaris’ dos caminda. Den artikel III.17 ta referi na staatssecretaris pero esaki ta un eror. Prome Minister a splica cu na prome instante, tempo cu Aruba a traha su Constitucion na aña 1985, bou iniciativa di Partido MEP, tawata plania pa bin cu e posicion pa secretario di estado pa comparti e peso di trabou cu e minister. Partido AVP no a bay di acuerdo cu esaki cu e pensamento cu MEP a bin cu esaki pa acomoda su hendenan.
AVP, pa e motibo aki, a saca e staatssecretaris for di Constitucion. Sinembargo, pa motibo di un descuido of un trabou slordig, e palabra staatssecretaris no a wordo saca for di e artikel menciona y ta menciona den dos caminda. Specificamente, e parti di e articulo aki ta referi na e posibilidad cu Parlamento por haci pregunta na un staatssecretaris y cu e staatssecretaris mester contesta.
E funcion di un staatssecretaris no ta hancra den nos Constitucion. Niun caminda ta menciona ni hancra ki ora por tin un staatssecretaris, ken ta apunt’e y kico ta su responsabilidadnan. E articulo aki tey solemente pa gobernador, minister y Parlamento. Pa bin cu secretario di estado, mester cambia Constitucion. Y pa cambia Constitucion mester di dos tercera parti di Parlamento, cu ta 14 voto. Y den nomber di Partido MEP, Prome minister a declara di no lo duna sosten na esaki, y sin Partido MEP e cambio no por pasa
Manera cu señor Mike Eman di AVP a declara, e kier bin cu un tipo di staatsecretaris. Den esaki Prome Minister a enfatisa cu señor Eman por bin cu kico cu e kier y yam’e manera cu e kier, pero e lo no ta un staatsecretaris cu tin e autoridad manera ta e caso na Hulanda. Loke sea Eman kier intoduci extra, lo ta un mini minister cu lo cobra hopi placa, haya hopi beneficio, cu gastonan di oficina, pa haci cierto tareanan cu e ministernan apunta no tin e capacidad pa eherce nan mes. Pero no tin niun autoridad pa ley. Cu otro palabra, Mike Eman kier goberna cu 14 minister.
A resalta tambe e echo cu e dos formadonan no ta riba un mesun linea riba e topico aki. Den nan declaracionnan duna na prensa, nan ta contradici otro riba e topico aki.
