Oranjestad-Aruba
Parlamentario di PPA, Otmar Oduber, durante conferencia a comenta cu su fraccion, cu sosten di fraccionnan di Futuro y AVP a pidi Presidente di Parlamento pa yama un reunion publico cu caracter di urgencia pa atende cu e incidente tristo unda un hoben di apenas 19 aña a perde su bida den un confrontacion cu Cuerpo Policial.
Durante e reunion aki, fraccion di PPA kier enfatisa cu si mester pone presupuesto disponibel pa por tin ekiponan necesario cu ta salvaguardia tanto polis como ciudadanonan, manera bodycam y camaranan pa autonan , pa ‘let’s do it’!
Tambe lo bay presenta un mocion, siguiendo loke a presenta den temporada di eleccion, caminda ta bisa cu ta e momento adecuado pa duna Cuerpo Policial y otro cuerponan cu ta pone nan bida na peliger, e atencion necesario cu un seguro adicional.
Otmar Oduber ta indica cu no por ta asina cu un mama, tata of yiu ta sali for di nan cas pa bay traha, poniendo nan bida na peliger, y nan ta conta cu e mesun seguro cu cualkier otro trahador publico.
Cu e mocion ta pa crea e posibilidad pa e ‘first liners’ cu ta pone nan bida na peliger, por ta sigur cu ora nan sali, nan por ta un tiki mas sigura conforme e trabou cu nan ta haciendo.
Adicionalmente el a bisa cu si e camaranan ta den pipeline caba, e ora pa haci e pipeline aki uno cortico y sigura cu den algun siman, poniendo fecha, esakinan por ta na Aruba y si ta falta di fondo, pa pone esaki disponibel.
Parlamentario di PPA a finalisa bisando cu e ta sinti cu den e caso lamentabel aki no tin oposicion ni gobierno, ta trata di un sucedido cu a touch tur hende y mester atende cune. Parlamento no por laga sin mas e caso aki bay sin pone su pensamento y decisionnan patras di e echo aki. “Mi no por papia den nomber di otro fraccionnan, pero mi ta sinti cu a pesar cu 3 traccion a firma e carta (PPA, Futuro y AVP), di parti partido MEP tambe tin e preocupacion y tambe kier a atende cune, unicamente cu nan kier a atende den un otro setting den forma di un bijeenkomst publico. Nos a prefera di hacie den un reunion publicopasobra eynan por manda un instruccion, un pensamento, un decision cla y raspa di parti Parlamento pa gobierno pa por wordo ehecuta”.
