A conta cu sosten di Futuro y AVP
Parlamentario Otmar Oduber a informa cu for di siman pasa fraccion di PPA a acerca tur fraccion den Parlamento pa ta cofirmante den un peticion pa Presidente di Parlamento pa atende cu e incidente cu a conmove henter comunidad. Ta trata aki di e hoben di 19 aña cu a perde su bida siman pasa den un confrontacion cu Cuerpo Policial.
Oduber ta considera cu e conmocion causa den comunidad a laga hopi pregunta y inkietud atras y como miembro di Parlamento mester dune e atencion necesario. Siman pasa fraccion di Futuro a firma e carta, pero pa un peticion pa reunion publico mester di tres firma minimo di miembronan di Parlamento. Asina e siman aki, fraccion di AVP cu algun adaptacion na e carta, a firma esaki.
Di e forma aki ta manda e carta pa Presidente di Parlamento pa den forma di urgencia yama un reunion pa atende cu e situacion aki cu a afecta henter comunidad. Di un banda tin un famia di un hoben cu a perde su bida y di otro banda tin Cuerpo Policial cu PPA lo kier pa sigui conta cu confiansa di comunidad, of si ta necesario, recupera esaki.
Otmar Oduber ta considera cu e trabou como Parlamento, como organo representante di pueblo, ta unda e minister responsabel, como tambe instancianan envolvi den e caso aki, esta Ministerio Publico y Cuerpo Policial, lo mester bin contesta e preguntanan di representantenan di pueblo. E ta considera esaki e forma con por sigura comunidad cu actonan manera esaki wordo preveni, pa nan no sosode mas y con ta atende cu nan. Pero banda di esaki, Oduber ta considera importante tambe pa duna tur hende e trankilidad cu bida di hende ta wordo salvaguardia pa medio di maneho y protocolnan cu ta ‘in place’ y cu ta actua conforme e meta di preserva bida y salud di nos comunidad.
“Intencion no ta pa nos mete den investigacion, investigacion tin cu cana su caminda y keda totalmente obhetivo pero transparente pa henter comunidad, cual no ta e sentimento na e momentonan aki. Nos mester sigura comunidad a traves di Parlamento, di e contestanan cu ta bin di gobierno, e minister y instancianan responsabel, cu e confiansa den e instancianan por tey of por wordo restableci”, Otmar Oduber a declara.
El a agrega cu durante e reunion publico por yega tambe na un conclusion di con por asisti pa e tipo di incidentenan aki no ripiti mas. Un di e pensamentonan cu fraccion di PPA tin ta pa polisnan cana cu ‘bodycam’, cual ta un forma cu ta proteha tanto e trabou di polis como tambe e ciudadano. Tambe por scucha e camaranan cu ta wordo instala den autonan di polis y asina filma dilanti y patras di dje, cual ta duna un siguridad na polis como na e ciudadano tambe.
Tambe Oduber a expresa cu kier mira cu tur caso ta wordo trata cu e mesun handschoen pa loke ta trata Ministerio Publico y Cuerpo Policial. “No por tin duda cu den cierto casonan si ta cana cierto protocolnan y den otronan no. Mi ta kere den Parlamento di Aruba ta caminda cu nos por sigura esaki”.
Parlamento tin un tarea di transmit un mensahe na comunidad cu nan por tin confiansa den nan Cuerpo Policial, pero tambe cu Cuerpo Policial por sinti cu Parlamento ta para pa e trabou cu nan tin cu haci, pa por tin e ekipo necesario y pa comunidad por sa cu e ta wordo protehi door di e mesun Cuerpo Policial aki.
Otmar a bisa enfaticamente cu no ta trata di un reunion pa punta dede den direccion di ningun hende, simo uno caminda cu Parlamento ta asumi su responsabilidad di percura pa un acto asina nunca mas tuma lugar, y tambe sigura cu e protocolnan y reglanan ta conta pa tur hende y asina evita cualkier duda den nos sistema hudicial
