ORANJESTAD – Awe den un reunion publico parlamento a trata reparticion di e comisionnan fiho den parlamento como tambe e presidencianan di e comisonnan. Minister Dangui Oduber, hunto cu su coleganan di e Partido MEP, a spera di por a haya oportunidadnan teniendo cuenta cu e resultado di eleccion. Pero presidente di parlamento sra. Gerlien Croes no a respeta e mas di 17.000 votadornan di MEP, tampoco no a respeta MEP su 8 asientonan.
Manera ta conoci caba e resultado di eleccion a duna MEP 6 asiento, AVP 6 asiento, Futuro 2 y PPA 1, cu restzetel e resultado aki a cambia bira MEP 8, AVP 9, Futuro 3 y PPA 1.
Den parlamento tawata tin 22 comision cu lo mester reparti e comisionnan y apunta presidente pa cada comision. Pa un parlamento representa pueblo y representa e votadornan den parlamento e presidente na su turno mester por respeta democracia y presenta un reparticion husto di e presidencia pa tur e comisionan, cual no a pasa awe.
Ta asina cu netamente e presidente nobo aki, sra. Gerlien Croes, a boga den su campaña pa un politica nobo, diferente, distinto y sigur un otro tipo di funcionamento di parlamento. E presidente aki sra. Croes ta conoci si caba pa ta un persona cu ta ‘’Flip Flop” ora ta cumbinie. Asina nos por corda con tempo e tawata forma parti di e Partido AVP e tawata totalmente contra e rijkswet y awor cu e ta forma parti di Partido Futuro e ta totalmente na fabor di e rijkswet. Pa loke ta funcionamento di parlamento mesun cos. Apenas algun luna atras e tawata boga pa partidonan den oposicion wordo respeta y tin mihor repsentacion sea como presidente di parlamento of como presidente di diferente comisionnan y awor e ta haya oportunidad pa practica loke e ta “preach” y ta haci net contrario. E ta bai bek na e mesun politica bieu, anticua di Partido AVP, caminda e la haya su prepracion y educacion. E mayoria parlamentarionan nobo a mustra un falta di respet pa democracia y en bes di cu Partido Futuro a representa e cambio den parlamento, mas bien e partido a bira e verlengstuk di Partido AVP.
Pa pueblo por compronde e discusión, Parlamento tin 22 comision y Partido MEP tin 8 asiento di e 21 asientonan den parlamento. Esaki kiermen si presidente sra. Gerlien Croes realmente ta respeta decision di pueblo, respeta MEP su votadornnan y duna nan e respresentacion cu nan merece, MEP lo mester a haya por lo menos 6 presidencia di e comisionnan.
Awor aki tin un situacion cu Partido MEP a haya solamente 1 presidencia di e 22 comisionnan y tin Partido Futuro cu tin solamente 3 asiento a haya 9 presidencia y Partido MEP cu 8 asiento ta haya solamente 1 presidencia! Por wak aki claramente cu algo NO ta cuadra cu e reparticion aki cual sigur no ta acceptabel tampoco pa nos votadornan.
Ki respet sra. Gerlien Croes por tin pa MEP su votadornan. Locual e la caba di haci ta mustra cu den parlamento 3 asiento ta bal mas cu 8? Kiermen den e dictadura nobo aki 3 asiento tin mas representacion cu 8 asiento den parlamento.
Awor pueblo mester puntra si realmente sra. Gerlien Croes kier mira cambio den manera cu parlamento ta funciona? Puntra si esaki ta e respet cu 17.000 votador (8 asiento) merece? Esaki ta un falta di respet di parti sra. Gerlien Croes na tur votadornan cu MEP ta representa. Pa MEP por haci su trabou di controla, vigila y cuestiona decisionnan di gobierno ta importante pa tin e presidencia di cierto comisionnan pa asina evita cu e coalicion AVP sin Futuro ta secuestra parlamento di Aruba y limita su funcionamento.
Mi ta lamenta cu sra. Gerlien Croes como presidente di parlamento tambe a sali malo y mas bien ta sigui pasonan di AVP pa asina purba silencia parlamento y stroba parlamento di funciona! No bin bisa cu nos a vota na fabor paso nos a bisa claramente den e reunion central cu nos ta na fabor “onder protest”, pasobra e reparticion aki simplemente ta un falta di respet pa nos votadornan. – Minister Demisionario Dangui Oduber
