ORANJESTAD,– Partido MEP ta refleha cu orguyo e siete aña di trabou duro y dedicacion bou di Gabinete Wever-Croes, un periodo cu a realisa e base fundamental pa stabilisa e situacion financiero di Aruba despues di e desaster financiero laga atras pa e gobierno anterior di partido AVP. Danki na maneho financiero responsabel di MEP durante gobernacion e utlimo dos periodonan, nos pais ta den un posicion mucho mas fuerte, prepara pa soluciona e desafionan cu por enfrenta y alabes cumpli cu pueblo di Aruba si ta actua na un manera responsabel.
Despues di reunionnan entre partidonan AVP y FUTURO cu diferente stakeholder di diferente sector, stakeholdernan cu conocemento riba finansas publico, ta sali di e reunionnan y ta expresa cu tin espacio financiero disponible pa e gobernacion entrante. Esaki ta debi na e gobierno cu a maneha finansas publico na un manera hopi responsabel apesar di tur desaster encontra di e gobierno di AVP y e retonan cu Covid a trece cu ne.
E stakeholdernan aki ta expertonan den e area financiero cu a confirma despues di e reunionnan cu e situacion financiero di Aruba a mehora considerablemente bou di e maneho di Lider di MEP y Prome Minister Evelyn Wever-Croes y su gabinete. E maneho cuidadoso di finansas pa Gabinete Wever-Croes a crea suficiente espacio pa asegura stabilidad y sostenibilidad di manehonan gubernamental pa e proximo periodo.
Esaki ta confirma e maneho cu transparencia y e impacto positivo di e politiconan di MEP cu a forma un gobierno di coalicion lidera pa Lider di MEP durante e ultimo siete añanan. Tambe, esaki ta consistente cu e declaracionnan reciente di CAFT, cu a elogia y confirma cu e maneho financiero cu Gabinete Wever-Croes a hiba, a pone Aruba den un posicion mas fuerte y resiliente.
Partido MEP ta sinti orguyo di e hecho cu a reestablede stabilidad financiero di nos pais a pesar di e desafionan cu nos a enfrenta. E exito aki ta un resultado directo di un gobierno cu a priorisa responsabilidad financiero, transparencia, y bienestar di pueblo Arubiano.
Awo, ta ora pa e gobierno entrante pa tuma ehempel y responsabilidad pa sigui e progreso aki y pa sigura cu e espacio financiero cu Gabinete Wever-Croes a crea lo ta uza cu sabiduria pa e beneficio di tur ciudadano. Partido MEP ta comprometi pa sigui apoya pueblo di Aruba den Parlamento y como partido, y nos lo continua pa mantene e gobierno futuro responsabel pa e maneho di nos pais cu nan lo hiba.
