Willemstad, Kòrsou, 18 di febrüari 2025 – Maduro & Curiel’s Bank (MCB) ku plaser ta anunsiá nombramentu di
- Quinten Fraai komo e Presidente i CEO nobo entrante 1 di yüni 2025. Quinten tin eksperiensia bankario internashonal ekstenso i a traha den diferente país i kultura. Además di su eksperensia profeshonal e tin lasonan personal i familiar ku nos islanan den Karibe Hulandes i un bon komprondementu di nos komunidatnan. Lionel (Chicu) Capriles II, Presidente i CEO aktual di MCB, lo asumí un funshon nobo komo miembro di e Hunta di Komisario, pendiente aprobashon di Banko Sentral, sigurando ku su eksperensia i konosementu amplio di e Banko lo keda disponibel.
Quinten Fraai tin mas ku 30 aña di eksperensia den servisionan finansiero. Aktualmente e ta CEO di Monuta, un kompania di seguro i servisio funeraria di renombre na Hulanda ku mas ku 1.5 miyón doño di pólisa. Anteriormente e tabata CEO di NN Insurance Bélgika i Luxemburg. E tin un karera bankario ekstenso di mas ku dos dékadá ku ta inkluí funshonnan di liderazgo klave manera co-CEO di ING Direct na Hapon, General Manager di Direct Channels na ING Bank Bélgika, Direktor di Savings & Mortgage Operations pa ING Direct den Reino Uní i EVP Operations na ING Direct Merka.
Islay McGlynn, Presidente di e Hunta di Komisario di MCB ta deklará: “MCB ta hunga un ròl klave den e ekonomia i komunidatnan di nos islanan den Karibe Hulandes i nos tabata buska un líder ku ta komprondé e responsabilidat aki. Quinten tin eksperensia amplio riba tereno bankario, kresementu digital i strategia, pero mesun importante ta tambe ku e ta kompartí e balornan di MCB. Nos tin pleno konfiansa ku e lo liderá nos Banko ku vishon i dedikashon. Mi ta hopi kontentu tambe ku Chicu lo djòin e Hunta di Komisario. Esaki ta sigurá ku MCB por sigui benefisiá di su eksperensia i konosementu, mientras nos ta sigui bai dilanti.”
Lionel (Chicu) Capriles II ta añadí: Mi ta yama Quinten un kaluroso bon biní na nos islanan den Karibe Hulandes. E ta e persona adekuá pa mantené nos balornan di famia haltu. For di aña 1916 e balornan aki ta forma e kurason di nos Banko. MCB ta fuerte, resiliente i bon posishoná pa futuro i mi tin pleno konfiansa ku Quinten lo sigui traha riba e fundeshi sólido aki. Mi lo sigurá personalmente pa hasi un transishon fasil i bon. Den mi funshon nobo den e Hunta di Komisario, mi ta spera ku antisipashon pa sostené e i nos Banko den e siguiente trayektoria di desaroyo.
Quinten Fraai ta remarká: “Mi ta sinti’mi sumamente honrá pa djòin MCB. Un Banko ku tin un ròl asina importante den Karibe Hulandes. Ku mi tata ku a nase i krese na Kòrsou, semper m’a sinti un konekshon fuerte ku e islanan. M’a desaroyá un apresio p’e kultura i partikularmente p’e sentido di komunidat ku ta hasi e país asina spesial. Mi ta komprondé kon krusial MCB ta pa e hendenan i negoshinan den e región aki. Lasonan fuerte ta forma e base di tantu e komunidat komo negoshinan i lo mi hasi mi máksimo pa stimulá relashonnan balioso i pa huntu ku e tim nos protehá i mantené MCB su herensia di konfiansa, stabilidat i servisio.”
Nombramentu di Quinten ainda ta suheto na aprobashon di akshonistanan, ku ta programá pa tuma lugá mas na fin di e kuartal aki. Entrante 1 di yüli 2025 e Hunta di Maneho di MCB lo konsistí di Quinten Fraai komo Managing Director i Presidente & CEO, Bill Said komo Managing Director i Group Head i Cris van Kempen komo Managing Director i Chief Risk Officer. E nombramentu di Cris (ku a keda anunsiá di 23 di yanüari 2025), ainda i manera kustumber ta suheto na aprobashon di reguladó i akshonistanan.
