Kralendijk – Durante e deliberacionnan cu a tene cu Colegio Ehecutivo y Conseho Insular di Boneiro, Colegio di supervision financiero di Boneiro, Sint Eustatius y Saba (Cft) a pidi atencion pa e problemanan cu frecuentemente ta keda refleha den e hayazgonan di Cft. Maneho financiero, e politica presupuestario y e funcionamento di e entidadnan gubernamental ta core peliger di recaida, pa motibo di un falta di capacidad di implementacion. Boneiro simplemente no ta in control.
Capacidad di implementacion
Den tur e areanan, Cft ta constata un falta di capacidad di implementacion, loke ta varia di un falta di tumamento di decision pa e gobernacion insular te un falta di implementacion di esaki. Esaki ta keda refleha den e recaida di maneho financiero, implementacion deficiente di maneho y funcionamento insuficiente di entidadnan gubernamental.
Maneho financiero
Den e añanan pasa, Boneiro a tuma pasonan importante pa mehora maneho financiero. Pa 2023, pa di dos biaha consecutivo, Boneiro a ricibi un declaracion completamente aprobatorio di auditor. Sin embargo, tin un recaida. E aña pasa, Cft a expresa su mes di manera critico den su consehonan, y a sinti e obligacion pa abstene di emiti huicio tocante di e di cuater informe di implementacion di 2024, pa motibo di e suministro deficiente di informacion. Di e manera aki, ta limita Conseho Insular den su tarea di supervision. Considerando e hayazgonan aki, Colegio Ehecutivo a invita Cft pa – riba termino cortico – duna consehonan mas detaya tocante di e structuracion di maneho financiero.
Implementacion presupuestario 2024 y consecuencianan pa 2025
Cft a reitera su preocupacionnan tocante di e factibilidad di e ambicionnan presupuestario di Boneiro, y ta observa un desaroyo preocupante respecto di recursonan no gasta. Den un plaso di 5 aña, e presupuesto di Boneiro a ser redobla, mescos cu e reservanan. E isla tin dificultad pa gasta e recursonan, y tin hopi placa di parkeer den reservanan aloca. Debi na esaki, ta aplasa pa añanan posterior e ambicionnan politico di 2024.
Entidadnan gubernamental
Cft tambe a pidi atencion pa corporate governance y e maneho di e entidadnan gubernamental. E funcionamento di Selibon ta demostra e urgencia di atende cu e puntonan aki mas pronto posibel.
Cobro di impuestonan local
Finalmente, Cft a reitera su obhecionnan contra e intencion di Boneiro pa tuma over e cobro di impuestonan local di Belastingdienst Caribisch Nederland. Esaki ta crea riesgonan considerabel pa e presupuesto di Boneiro. E organisacion administrativo ya caba ta bao di presion debi na e retonan den e area di implementacion di politica, maneho financiero y entidadnan gubernamental. Como reaccion, Colegio Ehecutivo a indica cu e lo laga den tur caso e funcion di loket di e servicio di impuesto cerca Belastingdienst Caribisch Nederland. Ademas, Boneiro lo priorisa pone na ordo e administracion basico di impuestonan.
