ORANJESTAD – Bureau Traimerdia (BTM) tin e privilegio di traha hunto cu e organisacion Internacional UNICEF NL & Save the Children NL y participa den e programa di TeamUp. Den e ocasion importante aki, dos lider di BTM lo forma parti di e training intensivo cu lo inicia 17 februari te cu 21 di februari 2025 na Boneiro.
Durante e training aki, nan lo siña tecnicanan y amplia nan conocemento pa implementa e actividadnan di movecion (weganan) cu ta forma parti di e programa di BTM.
E programa TeamUp ta yuda muchanan den nan desaroyo social-emocional via metodo di interaccion y movemento, cu ta fundamental pa nan bienestar y ta cuadra cu e vision y meta di BTM. Ta bay transferi e conocemento adkeri na e otro lidernan di BTM den forma di “train de trainer”, pa asina tur lider haya e conocemento y “tools” pa sigui ofrece un servicio di calidad na nos muchanan.
BTM ta e unico “Naschoolse Opvang” di Gobierno cu ta brinda cuido y guia na muchanan di 4 te cu 12 aña cu ta asisti na scol basico y muchanan special despues di ora di scol. Alabes, e ta e unico “Naschoolse opvang” cu ta brinda un tarifa social pa asina yuda famianan cu menos recurso y sigura cu tur mucha por disfruta di un ambiente safe y educativo.
BTM ta desea exito na e dos lidernan, Ruthsella Imperator y Leonardo Phillips, cu lo forma parti di e training di TeamUp den colaboracion cu un stakeholder importante cu ta UNICEF NL. Sigur cu nan conocemento y dedicacion lo sigui contribui na un miho futuro pa nos muchanan di Traimerdia.
