Tecnico Eldrick Dijkhoff, a logra un prestacion sobresaliente den e mundo di softball. Su dive play a wordo eligi como No. 1 den ‘World Baseball Softball Confederation Top-10 Plays of 2024’, destacando su habilidadnan excepcional y su dedicacion na e deporte.
Gerencia di ELMAR ta aplaudi y reconoce Eldrick su esfuerso y dedicacion pa e gran logro aki.
E reconocimento a surgi durante e Campeonato Mundial di Softball, cu tabata consisti di 136 partido den 6 diferente pais di hungadornan di atletismo impresionante. E hungada espectacular di Eldrick tabata sin duda un di e mihornan di e torneo, laga un impresion duradero na escala global.
Eldrick a cuminsa hunga baseball na e edad di 3 aña. Su amor pa e deporte a sigui crece y na 17 aña e a descubri su talento pa softball, inicialmente como hobby, pa despues uni na e famoso team local di ATCO Indians y despues forma parti di e team di Royal Power.
Un momento crucial a yega ora cu e seleccion di softball di Hulanda a bini Aruba pa entrenamento. Un hungador di e seleccion di Hulanda a keda impresiona cu e talento di Eldrick, y na 2012, ora cu Hulanda tabata busca reforsa pa e torneo di ‘World Cup Fast Pitch’ na New Zealand, Eldrick a keda na memoria y a wordo invita pa forma parti di e team di seleccion di Hulanda.
Durante su carera, Eldrick a representa Hulanda pa 11 aña, hunga na paisnan manera New Zealand, USA, Canada, Czech Republic, semper demonstrando su talento inigualabel y su amor grandi pa e deporte aki.
Despues di hopi aña di sacrificio, Eldrick a tuma e decision pa retira den 2024 despues di su ultimo torneo di World Cup, clausurando su carera cu un triunfo cu lo keda marca den historia como e No.1 den ‘WBSC Top-10 Plays’.
Awor Eldrick ta disfrutando como coach den CBN Eagles categoria U6, unda su yiu homber tambe ta forma parti di dje.
Eldrick, masha pabien! ELMAR ta sumamente orguyoso dibo. Sigui cu e bon trabou!
