Oranjestad/Utrecht,
Fonds voor Cultuurparticipatie (FCP) y CEDE ARUBA a forma un colaboracion unico pa sostene iniciativanan socio-cultural na Aruba y Sint Maarten. E programa conhunto, cu yama ‘LET’S ACT’, ta un proyecto piloto di dos aña cu un presupuesto total di €1.000.000 cu ta enfoca riba desaroyo di talento, participacion cultural y ta pa fortalece e capacidad den e sector cultural.
Cu e programa aki, nos ta tuma un paso importante pa mehora acceso na arte y programanan cultural den e region Caribe-hulandes. Hunto cu organisacionan local manera Sint Maarten Development Fund (SMDF), y Foresee Foundation, CEDE ARUBA ta duna sosten na organisacionan cultural y social cu ta traha pa promove creatividad y colaboracion den e comunidad.
Un aspecto clave di e programa LET’S ACT ta e principio di ‘fair pay’, cu ta garantisa cu artistanan local y organisacionan cultural ta wordo hustamente paga pa nan trabou. Esaki ta contribui na nan estabilidad economico y desaroyo artistico. Door di promove pago husto y colaboracion sostenibel, e programa no solamente ta sostene e sector cultural, pero tambe ta crea un tereno di igualdad pa tur participante.
E LET’S ACT-programa ta enfoca riba:
- Expansion di acceso na arte y cultura – Door di proyectonan y actividadnan cu ta unifica comunidadnan, grupo vulnerabel y proveedor cultural.
- Fortalecemento di capacidad – Duna formacion, mentorado y sosten na artistanan local, organisacionan cultural y iniciativa social.
- Cooperacion y co-creacion – Motiva organisacionan cultural y social pa traha hunto y crea impacto sostenibel.
“LET’S ACT, ta e método pa yuda traha pa haci programanan cultural mas accesibel, mientras cu tambe nos ta crea un conexion entre comunidadnan y fortalece e paisahe cultural den e Reino Caribeño. Esaki ta un hito importante den nos esfuerso pa inclusividad y crecemento cultural,” segun Barbara de Greef, Director di FCP.
E programa ta duna financiamiento directo y sosten na mas di 50 organisacion cultural y social riba e dos isla. Esaki ta un inversion den cooperacion pa un tempo largo, sostene actividad cultural den diferente disciplina, y facilita formacion y involvimiento di grupo nan vulnerabel, incluyendo yiu, hoben, adulto, mayor, indocumenta, y persona den rehabilitacion y/of detencion.
Un presupuesto di €533.000 ta destina pa Aruba, mientras cu Sint Maarten ta ricibi €267.000. Adicionalmente, €100.000 lo ta usa pa fortalecemento di capacidad, y €100.000 pa costo operacional.
Daniel Tecklenborg, Director di CEDE ARUBA, a enfatisa: “E programa aki ta duna un boost nobo na e coneccion entre e sector cultural y social den nos islanan. Esaki ta un oportunidad pa sostene talentonan y organisacion nan local, cu tambe ta involucra grupo cu normalmente no tin hopi acceso na programanan cultural.”
Durante 2024 a traha na preparacion di e programa, a base di un survey y unda a duna oportunidad na tur organisacion pa manda documento y nan proyecto. Esaki a keda aproba pa FCP durante luna di November 2024. E programa LET’S ACT a cuminsa na januari 2025 cu un fase di preparacion, unda ta sera contrato cu e participantenan di e organisacion. E fase aki lo dura te fin di februari 2025. E fase di ehecucion di proyecto lo cuminsa na maart 2025 y lo dura te fin di september 2026, unda proyectonan cultural y social lo wordo implementa na Aruba y Sint Maarten. Durante e periodo aki, tambe lo tin workshop y sesion di capacitacion pa maximalisa impacto di e programa. E fase final, cu ta di october te december 2026, lo inclui exposicionnan, presentacion di resultado realisa y un raport financiero completo di e programa.
Tocante Fonds voor Cultuurparticipatie
Fonds voor Cultuurparticipatie ta un di e seis fondo cultural nacional di e Ministerio di Enseñanza, Cultura y Ciencia Hulandes, cu ta traha pa haci cultura accesibel pa tur hende. E fondo tin e mision pa crece su impacto den e parti Caribeño di e Reino, especialmente pa sostene iniciativa cultural cu ta dirigi na grupo vulnerabel y persona cu tin hopi obstaculo pa participa den comunidad. Cu LET’S ACT, Fonds voor Cultuurparticipatie ta fortalece su dedicacion na e region Caribeño, poniendo iniciativa y organizacionnan local den e centro.
Tocante CEDE ARUBA
CEDE ARUBA ta un NGO y organisacion di desaroyo local cu ta traha pa desaroyo comunitario y sostenibel na Aruba pa mas di 45 aña. Door di colaboracion cu partnernan financiero y iniciativa den y fo’i e Reino Caribeño, CEDE ARUBA ta duna sosten na comunidad y organisacionnan local, cu e meta di crea impacto social y cultural door di cooperacion, financiamiento y formacion.
