ARUBA- 12.02.2025. Stranhero (imigrante) cu a solicita pa un permiso di estadia na Aruba y a haya un ‘Voorlopige Toelating Aruba’ (VTA) for di DIMAS, mester presenta cerca un dokter aproba pa Directie Volksgezondheid (DVG) pa un screening medico obligatorio. E screening aki anteriormente por a wordo eherce unicamente pa dokternan di Medwork pero desde dialuna dia 10 di februari 2025 e screening aki ta posibel tambe na Urgent Care.
Medwork: Pa traha un cita pa e screening medico, e solicitante mester presenta personalmente na Medwork situa na Margrietstraat 3, Oranjestad, di dialuna pa diabierna entre 8:00- 12:00 y 13:00- 16:00 cu un paspoort valido y e formulario ‘Voorlopige Toelating Aruba’ (VTA). Tambe mester trece e paspoort a base di cual a drenta Aruba ultimo biaha. E gastonan pa cu e screening ta costa Afl. 75.00 y esaki mester wordo paga na momento cu e solicitante bin pa traha e afspraak. E cartanan di referencia pa e diferente tipo di testnan, manera test di PPD/Mantoux, radiografia di pecho y analisis di sanger lo wordo suministra pa Medwork. E costo pa e testnan aki mester wordo paga na e respectivo instancianan medico unda lo haci e testnan necesario.
Urgent Care Aruba (UCA) : Ta ofrece examinacion medico pa imigrante na dos localidad. Na Noord Medical Center cu ta localisa na Noord 63 y na Punta Brabo Medical Center cu ta localisa na Caya Punta Brabo 11. No ta necesario pa traha un cita; aplicante por bay personal cu un paspoort valido y e carta di ‘Voorlopig Toelating Aruba’ (VTA). Tambe mester trece e paspoort a base di cual a drenta Aruba ultimo biaha. E gastonan pa cu e screening ta costa Afl. 75.00. E localidad na Noord ta habri dialuna pa diabierna di 8:00-16:00 y diasabra di 8:00-12:00. Aplicante por completa e examinacion medico cu ta necesario, e test di laboratorio y e x-ray di pecho na e mesun localidad e costonan pa e testnan por wordo paga na momento di servicio. E examinacion pa imigracion medico cu e testnan respectivo lo ta cla den 24 ora.
Mas informacion riba e proceso y instancianan medico unda por haci e diferente testnan por ser encontra riba DVG su website https://dvg.aw/pa/dimas/.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na [email protected]
