ORANJESTAD – Diamars merdia, un gran cantidad di persona a acudi na e yamada di Partido MEP pa tuma despedida y rindi honor na un fiel sostenedor di partido. Señor Hendrick Croes tabata un co-fundador di partido MEP y a lucha semper hunto cu nos libertador Betico Croes y lider honorario di partido señor Nelson Orlando Oduber.
Den e ultimo añanan Hendrick (qepd) tabata un consehero di Lider di MEP y Prome Minister di pais Aruba, Evelyn Wever-Croes y a sa di brinda tur su experticio pa asina exitosamente hiba partido MEP dilanti. Tambe como fiel sostenedor Hendrick semper a yama radio pa sali na defensa di partido pasobra e amor cu tabata biba den su curason pa MEP y pa pueblo di Aruba tabata hopi grandi.
Durante e merdia aki na Cede di MEP dilanti señor Hendrick Croes su famianan y amigonan di partido, a hiba palabra Secretario General Endy Croes, Presidente di partido Ricky Hoek y Comisario Internacional di MEP Gerrit Croes. Na final di nan discurso a pone un krans den nomber di partido. Despues presidente di Forsa Femenino Grace a hiba palabra y tambe a pone un krans den nomber di Forsa Femenino Grace.
Partido Movimiento Electoral di Pueblo MEP ta gradici Hendrick su casa, señora Mauricia Croes – Willems (Yuyu) pa semper a comparti Hendrick cu nos. Señora Yuyu tambe ta un fiel sostenedor di partido y cu a fungi pa 40 aña largo tanto den Comision Nacional di Damas y como presidente di Forsa Femenino Grace percurando asina pa cumpli cu tur e trabounan necesario den e hala femenino di Partido MEP.
Lider di partido MEP Evelyn Wever-Croes ta gradici Hendrick pa tur loke el a haci y a significa pa Partido MEP. Pa e bon consehonan durante añanan, pa su amor grandi pa partido y pa semper a para firme como defensor di partido MEP.
“Nan ta bisa cu un hende no ta muri ora e fayece, sino e ta muri ora nos lubid’e. Nos compromiso na su casa Yuyu, y su yiu Hendrick Jesus Croes, ta cu hamas nos lo lubida Hendrick. Mi ta desea e famia, amistadnan y e famia di MEP hopi forsa na e momento aki cu perdida di nos bon amigo y soldaat fiel Hendrick Croes. Cu Hendrick sosega na paz den brasa di Señor,” Lider di partido Evelyn Wever-Croes a expresa.
