Oranjestad-Aruba
Diadomingo unit narcotica ta haci un inval riba un semi laboratorio di cocaine na un compleho di apartmento situa na Schotlandstraat.
Na yegada di unit narcotica na dicho sitio ta detene dos turista procedente di Corsou.
Ta trata aki di e hombernan di inicial Q.V.M. naci na Corsou di 35 aña y e homber A.A.A.R. naci na Corsou di 31 aña.
Unit Narcotica no a para keto y awe mainta tempran a mobilisa cu un team y a haci un entrada hudicial na Aliviostraat y ta detene e homber di inicial G.B.M. naci na Aruba di 35 aña . E detencion ta pa bendemento di droga. Den e cas a bin encontra un plantacion di marihuana y na unda a confisca esakinan tambe.
Diferente departamentonan di Cuerpo Policial a forma parti di e accion. Entre otro team di Aresto, K-9 Unit, polis uniforma como tambe ministerio publico.
Cuerpo Policial ta haci un apelacion na es cu sa algo of a wak algo pa yama tiplijn di polis cu ta 11141. Bo ta keda anonimo.
