Den Haag – Prome Minister demisionario mr. Evelyn Wever-Croes a haci un bishita na Gabinete di Minister Plenipotenciario di Aruba. Durante di e bishita aki e mandatario a tene combersacionnan cu Minister Plenipotenciario demisionario mr. Ady Thijsen y director di Gabinete di Aruba Joselin Croes LL.M/M.Sc.
Tambe premier Wever-Croes a tuma tempo pa reuni y papia cu e personal di Gabinete di Aruba. Señora Wever-Croes a duna elogio na e staf y personal di Gabinete di Aruba pa e bon trabao desplega e ultimo añanan en especial pa nos studiantenan. Premier Wever-Croes a bisa cu ainda tin e problema cu vivienda pa studiante y cu e ta contento cu Gabinete di Aruba ta purba na trece solucion pa cu esaki, pa dificil cu e ta keda, mirando cu e ta un problema den henter Hulanda.
Otro topico cu a bin dilanti den e combersacion ta e renovacion di e edificio di Gabinete di Aruba na R.J. Schimmelpennincklaan. E trabaonan lo cuminsa e aña aki y lo ta cla na 2026. Segun Prome Minister Wever-Croes un aña importante, pasobra Aruba ta celebra 40 aña di su Status Aparte.
Premier Wever-Croes a gradici e staf y personal di Gabinete di Aruba pa nan empeño pa traha na bienestar di Aruba na Hulanda y asina contribui na e bon representacion di Aruba na Hulanda y Union Europeo.
