ORANJESTAD: Dialuna mainta, Parlamentario Endy Croes hunto cu Parlamentario Hendrik Tevreden a acudi na veld di Dakota pa presencia inicio di e proyecto di renobacion y cambio di luz anticua, esta “halogeenlampen” pa luz LED ultramoderno. E proyecto a inicia na luna di juni di aña 2024, unda cu a tuma e decision pa cambia pa luz LED ultramoderno cu ta mucho mas eficiente pa e veldnan na Aruba. A traha un plan, unda lo order e luznan den “batch” di cinco (5) veld den conhunto y a planifica pa haci e prome order durante e di dos mita di aña 2024. Un di dos (2) order pa cinco (5) otro veld a wordo planifica desde e tempo ey caba pa tuma luga na inicio di aña 2025. Un di tres (3) order lo mester tuma luga den e di dos mita di aña 2025. Durante aña 2026, lo mester finalisa e proyecto aki. En realidad e prome order a tuma luga den luna di october y a yega Aruba fin di december 2024. Mientras, a atende cu e directivanan di e veldnan pa nan por re-organisa nan training riba e fechanan cu lo baha e postenan. A prepara tur cos pa por inicia cu e bunita proyecto aki. E trabounan a inicia dialuna ultimo, unda cu a baha e seis (6) postenan di luz di veld di Dakota, cual ta e prome veld cu lo ricibi e atencion. Lo “high pressure wash” e mastnan, lo aplica un tratamento di un material “macro proxy” y lo “prime” e mastnan cu un “epoxy primer” pa despues verf nan cu un “ultra paint” (antirust) pa garantisa cu nan lo no frustia pa minimo 10 aña. Tambe, lo instala “bracket” nobo y luz LED ultramoderno, pues un sistema completamente nobo. E trabou a inicia e siman aki na veld di Dakota y lo continua na veld di Estrella sigui despues cu veld di San Luis, Sportboys y Tanki Leendert. “Mi ta gradici Minister di Deporte actual Sr. Dangui Oduber pa sostene e proyecto aki realisando asina e vision di Gabinete Wever – Croes II y pa brinda mi e oportunidad pa sigui guia e Proyecto di Luz. Nos ta orguyoso di mira e fruto di e simia cu nos a planta wordo cristalisa y bira un realidad. E ganado final ta nos mucha- y hobennan cu ta haya un facilidad y infrastructura ultramoderno pa practica nan deporte. Pabien na nos colega Parlamentario di Dakota Hendrik Tevreden, pabien Dakota cu e bunita proyecto aki y pabien nos hobennan cu lo disfruta di esaki”, Parlamentario Endy Croes a finalisa.
