ORANJESTAD – Un reunion hopi importante cu Prome Minister Evelyn Wever-Croes tabata tin durante su biahe di trabou pa Hulanda, ta e reunion cu Minister di Buitenlandse Zaken señor Caspar Veldkamp. Dos tema importante cu nan a cubri durante e reunion aki tabata e situacion actual na Venezuela y e posicion di e gobierno nobo Mericano.
Tema: Venezuela
Prome Minister a indica cu e situacion na Venezuela ta un topico cu tin Gobierno di Aruba basta preocupa. Ta importante pa compronde ki efecto tur e desaroyonan interno, y e situacion di derecho humano cu tin na Venezuela, tin riba Aruba, y pa sa kico ta e posicion di Union Eurpeo riba Venezuela ya cu nan no ta reconoce Presidente Maduro como e presidente ganado y pa e motibo aki no a atende e inauguracion. Tambe ta importante pa sa kico ta e siguiente paso di nan banda. Riba esaki Prome Minister a haci hopi pregunta cu ta hiba bek den e tereno di UE pa nan por fiha un posicion.
Pa loke ta e topico di Venezuela, e combersacion tabata uno hopi largo. Prome Minister a splica Minister Veldkamp e motibo pakico ta importante pa Aruba tin claridad riba e topico di Venezuela. Venezuela ta hopi cerca di Aruba y tin hopi hende cu tin laso familiar, economico y cultural cu e pais. P’esey ta importante pa Aruba ta bon informa riba e posicion cu ta wordo tuma pa cu Venezuela na Den Haag y cu UE.
Tema: Gobierno nobo na Merca
Un tema cu Prome Minister a delibera hopi riba dj’e durante varios reunion na Den Haag, ta e posicion di e gobierno nobo Mericano pa loke ta trata e maneho migratorio. President Trump a declara cu e lo hiba un maneho migratorio hopi mas estricto, y p’esey ta importante pa Gobierno di Aruba ta consciente di kico ta bay pasa, ya cu cualkier decision na Merca por tin su efectonan. E pilar economico principal di nos pais ta turismo, y mayoria ta bin di Merca.
Durante su reunion cu Minister Veldkamp, Prome Minister tabata tin e oportunidad di papia di tur e retonan cu Aruba lo por enfrenta debi na e decisionnan cu e presidente nobo na Merca lo por tuma. Aki a intercambia ideanan y papia di diferente scenario pa asina ta miho prepara den caso di cualkier eventualidad. Pa loke ta e decision di Merca pa hisa tarifanan, derechonan di importacion, esaki sigur lo tin un efecto riba costo di bida na Aruba, mirando cu productonan lo bira mas caro. Actualmente no tin motibo pa preocupa pero si pa ta miho prepara. P’esey e reunionnan aki ta asina importante, pa elabora riba varios scenario y pa tin un posibel solucion dado caso.
Na final di e reunion, Minister Veldkamp a tuma e oportunidad, ya cu Gobierno di Aruba ta den momento di transicion, pa gradici Prome Minister pa representa Reino Hulandes dignamente den varios ocacion, specialmente pa e manera con Prome Minister a guia e reunionnan na Nacionnan Uni, y pa representa Reino den diferente toma di presidencia den e region.
Na su turno, Prome Minister a gradici Minister Veldkamp pa e oportunidad di por a reuni cu su persona, y a indica na dj’e cu p’e lo mas importante ta pa semper tin un bon cooperacion y relacion entre Aruba y Gobierno Hualndes. E tabata un reunion positivo na unda a informa Minister Veldkamp den detaye riba e posicion di pais Aruba.
