Cu bista riba un futuro mas tecnologico y digital
Durante un reunion virtual cu a tuma luga diaberna siman pasa, a logra combersa cu Sra. Damaris Young, cu ta president di Comite Olimpico di Panama (COP) den cuadro di un sistema digital cu recién COP a implementa. Banda di Damaris, tambe presente den reunion tabata Director Tecnico di COP, Sr. Carlos Ivan Bermeo cu tambe ta conta di su experencia utilisando e plataforma digital nobo di COP na nivel deportivo.
E sistema cu COP a implementa ta un plataforma digital cu ta ser usa den tur capacidad importante di un Comité Olimpico Nacional. E plataforma aki jama “COP Online” y ta no solamente pa usa di e personanan cu ta traha cu COP, pero tambe e federacionnan deportivo y demas gruponan di interes. A traves di inteligencia artificial y otro “tools” digital, e plataforma ta percura pa simplifica hopi proceso y crea un sistema unda tur hende ta traha igual. Comite Olimpico Arubano (COA) ta mira esaki manera un tremendo “tool” digital cu sigur ta interesante pa por haci uso di dje na Aruba. COA ta den proceso di kier implementa mas tecnologia manera plataformanan digital y inteligencia artificial, pa asina facilita e procesonan pa un y tur. #TEAMARU
