ORANJESTAD – 54 aña pasa, dia 9 di februari 1971, señor Gilberto François “Betico” Croes a funda Movimiento Electoral di Pueblo (MEP), un partido politico cu a cambia e curso di historia di Aruba pa semper.
Gilberto François “Betico” Croes
Betico Croes, un lider carismatico y determina, tabatin un soño pa un Aruba cu ta para den su propio sapato. Su creencia firme den e potencial di Aruba, tawata e forsa cu a pone lanta na buskeda di Status Aparte, un status separa den Reino Hulandes. Despues di añanan di lucha incansabel, e soño di Betico y di e pueblo Arubiano a bira realidad dia 1 di januari 1986, ora cu Aruba a logra su independencia como un pais autonomo. Aunke Betico a fayece poco prome cu e momento historico aki, su legado como e politico cu finalmente a logra Status pa Aruba y como “Libertador di Aruba” ta keda di generacion pa generacion, y MEP ta sigui ta un simbolo di su vision duradero.
Nelson O. Oduber
E di dos lider di MEP, señor Nelson O. Oduber, a tuma e liderazgo di e partido y a bira e prome Prome Minister di Aruba pa Partido MEP. Oduber a sirbi como Prome Minister pa un total di 16 aña den 4 mandato. Señor Nel Oduber, durante su gobernacionnan, a pone e pais aki realmente para riba su pia cu principio di bon gobernacion, a logra scrap e fecha di independencia pa asina awe nos por lanta nos yiunan y nan yiunan den e libertad di nos Status Aparte. Bou di su liderazgo, Aruba a experencia crecemento economico significante, specialmente den turismo, cu a bira e columna vertebral di e isla. Oduber a duna prioridad na educacion, infrastructura y desaroyo sostenibel, asegurando Aruba su luga como un nacion prospero den Caribe. Su dedicacion na e vision di Betico pa autodeterminacion y progreso a fortalece e rol di MEP como un pilar politico Arubiano.
Evelyn Wever-Croes
Awendia, Partido MEP ta ser lidera pa señora Evelyn Wever-Croes, e prome Lider femenino di Partido MEP desde 2011, guiando un ekipo di candidato determina pa trece cambio y haci diferencia positivo den bida di tur ciudadano di Aruba. Na 2017, Evelyn Wever-Croes a haci historia como e prome Prome Minister femenico di Aruba. Un lider dinamico y progresista, Wever-Croes a enfoca riba modernisa e economia di Aruba, promove igualdad social y maneha desafionan grandi. Su maneho a pone e escenario pa un futuro sostenibel caminda Aruba ta keda lider den energia renovabel y innovacion den nos area, mientras cu ta continua pa crea un sociedad cu ta priorisa oportunidad y empoderamento. Su liderazgo durante e pandemia di COVID-19 a mustra su resiliencia y compromiso pa e bienestar di tur Arubiano. Bou di su guia, MEP ta sigui mantene e balornan di su fundadonan mientras ta adapta na e necesidadnan di un generacion nobo.
Candidatonan determina pa e mesun causa
Durante 54 aña, Partido MEP a conta cu 178 candidato riba su listanan prestigioso. Homber y muhenan, cada uno cu su propio historia y contribucion, a forma parti di e trayectoria di Partido MEP, tur cu e mesun dedicacion pa lucha pa e mesun causa y na e mesun norma y balornan cu a funda e partido. Candidatonan determina pa representa union y progreso, trabou duro y amor pa Aruba. Nan a y ta lucha pa e bienestar di nos pueblo, pa un futuro miho pa tur ciudadano. E dedicacion di e homber y muhenan aki ta un reflexion di e compromiso di union cu a haci cu MEP ta mantene un legado duradero den historia di Aruba.
Conclusion
E trayectoria di MEP, for di e soño di Betico Croes pa Status Aparte te na e liderazgo transformado di Oduber y Wever-Croes, ta un simbolo di e poder di vision, perseverancia y union. Pa 5 decada, tanto den gobernacion, Parlamento of como partido, Partido MEP ta guia y dirigi Aruba na direccion di progreso y prosperidad. Partido MEP ta kere cu tin miho dianan pa Aruba, inspira pa e legado di su lidernan remarcabel y un ekipo di candidato determina pa gara e bandera di liberdad y sigui cu e lucha pa mas prosperidad pa nos pueblo.
