ORANJESTAD – Awe mainta e homber Colombiano biba na Aruba, Javier Tejedor Perez Tejedor (J.P.T.) (64) a presenta ayera dilanti Hues pa scucha su sentencia. El a wordo haya culpabel di a ocasiona e accidente falta cu a sosode riba 24 Mei 2024.
ARUBA NATIVE por a compronde cu Fiscal a exigi 4 aña di prison y Hues a reduci esaki na 3 aña y 6 luna di prison, pero a condena J.P.T. na otro castigonan.
SENTENCIA
Den sala di Corte tabata presente famianan di e defunto Jeferson Lopez. Hues a bisa J.P.T. cu e ta haya legalmente proba cu dia 24 Mei 2024, J.P.T. a causa un accidente fatal na Calabas. Hues a bisa cu J.P.T. tabata burachi y no a duna preferencia. Tambe cu e no tabatin rijbewijs. Hues tambe ta haya J.P.T. culpabel di e otro acusacion cu riba 14 December 2022, tambe el a core auto bou influencia di alcohol y ocasiona un accidente frontal.
CORE IRRESPONSABEL
Hues a bisa cu e abogado a bisa cu J.P.T. no a core irresponsabel sino a haci calculacion malo ora el a pasa e truck cu tabata para su dilanti. Hues a mustra cu Fiscal ta haya cu J.P.T. a core hopi irresponsabel. Hues ta di opinion cu J.P.T. tabata core burachi y a pasa un truck y dal frontal contra e brommer cu consecuencia cu Jeferson Lopez a fayece na e sitio.
Hues a remarca cu 5 ora despues di e accidente, a haci test di alcohol cu J.P.T. y e resultado tabata 413 microgram di alcohol cu ta 2 biaha mas cu e cantidad permiti pa ley. Na opinion di Hues, J.P.T. mester a para y laga e brommer pasa. Hues ta haya cu na momento di e accidente, J.P.T. tabata hopi burachi. Hues no ta haya cu tabatin un truck para riba caminda manera J.P.T. ta bisa y si ta asina mes, J.,P.T. mester a para warda e brommer pasa.
Hues ta haya cu J.P.T. tabata core hopi irresponsabel cu a causa morto di Jeferson Lopez.
Hues a tuma J.P.T. hopi na malo cu el a bay bebe y core auto, siendo cu na 2023, el a wordo condena pa sigui curso pa no core auto bou influencia. Hues a remarca cu e curso no a concientiza J.P.T. pa stop di bebe. Hues a bisa cu dia di e accidente, J.P.T. tabatin un cups cu biña den e auto. Hues ta haya cu mester duna castigo di prison y confisca e auto.
CASTIGO
Pa cu e demanda di daño, Hues a aproba e suma di 27.107 florin mas 800 florin pa preparacion di e caso di parti di e famia. Hues a declara no admisible e otro demandanan. El a bisa cu e famia lo por haci un caso civil pa esaki.
Hues a condena J.P.T. na 3 aña y 6 luna di prison, mas e 2 siman di prison cu tabata condicional di un otro caso di accidente. Tambe Hues a dicidi cu pa 5 aña ta kita e rijbewijs di J.P.T.
Hues tambe a dicidi cu e auto di J.P.T. ta keda confisca. Pa cu e demanda di daño. Hues a pone e medida di pago. Esey ta nifica cu si J.P.T. no paga e daño, e lo mester bay sera 170 dia.
|
ReplyForward
|
