Den Haag – Durante un sesion na De Haagse Hogeschool a tuma lugar presentacion di dos “beleidsadviezen” cu e grupo di studiantenan di Minor Koninkrijksrelaties a traha ariba peticion di Gabinete di Aruba. Esaki a tuma lugar den presencia di Prome Minister demisionario Evelyn Wever-Croes, Minister Plenipotenciario demisionario Ady Thijsen, director di Gabinete di Aruba Joselin Croes y personal di Gabinete di Aruba.
Prome cu e presentacion di e “beleidsadvies” nan, dos studiante di Minor Koninkrijksrelaties a duna un relato di nan biahe di estudio na Aruba, Boneiro y Curaçao. Despues e studiantenan cu a traha riba e “beleidsadvies” nan a tene un presentacion. Un “beleidsadvies” ta riba e tereno di Communicacion y Marketing y e otro ta riba e tereno di exito di e studiantenan. Den e presentacion a duna un analisis con nan a conduci e investigacion y kico tabata e aspectonan cu nan a concentra riba dje. Na final di ambos presentacion a presenta solucionnan den e “beleidsadvies” nan.
Minister Plenipotenciario demisionario mr. Ady Thijsen a gradici e studiantenan di Minor Konikrijksrelaties pa nan trabao. Segun e mandatario e “beleidsadvies” nan aki ta contene puntonan importante cu sigur lo yuda Gabinete di Aruba den su maneho pa cu nos studiantenan y pa Gabinete di Aruba ta mas visible na Hulanda, den Reino Hulandes y den Union Europeo, segun e vision di Gabinete di Minister Plenipotenciario di Aruba.
