Oranjestad-Aruba
Oranjestad, 6 februari 2025 – ELMAR ta recorda e comunidad di Aruba, y particularmente e personanan cu haya kavel den e area di Vondellaan, L.G. Smith Boulevard y riba ruta di carnaval na San Nicolas, pa evita di claba staka of penchi den acera of tereno publico.
Den hopi parti di Aruba, tin un infrastructura electrico bou tera cu ta inclui kabelnan di 60 kiloVolt, esencial pa suministro continuo di coriente na cas y negoshinan. Claba staka of penchi den tera sin e informacion necesario ta crea un riesgo electrico real y significativo di wordo electricuta, tanto pa esnan cu ta ehecuta e accion como pa esnan den e area.
ELMAR a ricibi alerta cu tin persona cu ta claba staka y penchi den acera of tereno publico sin considera e mapa di e kabelnan, aumentando e posibilidad di situacion peligroso. Pa preveni risiconan innecesario, nos ta recomenda personan cu haya kavel pa opta pa solucionnan alternativo, manera saconan di santo, peso, of piedra, enbez di bora den tera pa ancra.
Danki pa e comprension y cooperacion. ELMAR ta desea henter Aruba un temporada di Carnaval dushi, sano y sigur. Den ritmo di tumba, sinti e energia!
