Bon Bini Brighter Future Foundation na famia di HOH
Na Horacio Oduber Hospital (HOH), nos ta kere firmemente den duna bek na nos comunidad, cu enfoke special riba nos muchanan, cu ta e futuro di nos isla. Nos mision di tur dia ta pa ofrece cuido di salud accesible pa tur hende na Aruba, manteniendo semper e calidad di nivel. Pero banda di cuido di salud, nos ta reconoce cu tur mucha tin derecho fundamental na ricibi educacion di calidad y un futuro briyante, esta balor cu ta bay man den man cu e mision di Brighter Future Foundation.
E aña aki, Hunta di Directiva di HOH, esta sr. Jacco Vroegop y sr. Gregory Croeze ta honra y gradici pa e oportunidadnan cu a yega nos caminda como Hospital. Danki na e ingreso adicional cu ta wordo genera pa medio di turistanan di afo cu pa un of otro motibo di salud, mester di cuido medico durante nan vacacion na Aruba, nos tin e oportunidad pa haci un gesto significativo na cinco mucha.
Educacion pa muchanan special ta rekeri mas fondo cu actualmente tin disponibel cu ta pone cu algun mucha ta perde e oportunidad di asisti e scol excepcional aki. Pues, HOH a scoge pa patrocina educacion di cinco mucha cu ta bishita Brighter Future Foundation. Di e forma aki, nos ta aporta pa e muchanan aki por ricibi educacion, recurso y oportunidadnan cu nan merece, sigurando cu nan tambe por alcansa nan potencial maximo.
Na HOH, nos ta compromete no solamente cu salud y bienestar di nos comunidad, pero tambe den crea un Aruba mas fuerte, educa y yena di potencial. Nos ta expresa nos gratitud na e bishitantenan cu ta haci e donacion aki posibel pa nos por duna bek y inverti den futuro di nos isla.
Hunto, team di HOH y Brighter Future Foundation ta construi un futuro mas saludabel y briyante!
