ORANJESTAD – Prome Minister Evelyn Wever-Croes lo ta biahando e siman aki pa Hulanda pa asisti algun reunion importante na Den Haag. E prome reunion cu Prome Minister lo atende ta cu Prome Minister di Hulanda Dick Schoof pa asina elabora riba algun tema relevante di Aruba y Hulanda. Tambe lo papia riba e desaroyonan andando na Merca despues di e huramentacion di Donald Trump como e presidente nobo y tambe lo papia riba algun desaroyo na Europa.
Prome Minister a indica cu tambe e lo reuni cu Secretario di Estado Zsolt Szabó pa asina manera acorda aña pasa, pasa riba e negosiacionnan cu tin andando. Prome Minister tabata wardando riba e formacion di Gobierno di Aruba keda cla, pero mirando cu e proceso aki ta canando un poco slow, el a tuma e decision di bay Hulanda pa asina por tin un miho bista na unda Aruba ta para cu e negosiacionnan y con lo continua.
Pa loke ta e negosiacionnan cu Hulanda, aña pasa Aruba y Hulanda a yega na un acuerdo cu Secretario di Estado Alexandra van Huffelen pa baha e interes di 6.9% pa 5.1% riba e debe di covid, cu e condicion cu lo mester sigui negocia pa yega na un ley di Reino y pa esaki Aruba tin te 1 di Mei, 2025 pa logra. Prome Minister a inidica cu e negosiacionnan ta continuando y ta bayando bon pero a yega momento cu esaki mester wordo atendi riba “bestuurlijkniveau”. Hunto cu esaki, y conhuntamente cu Arubahuis lo mester atende e retonan cu e Arubianonan bibando na Hulanda ta atende cu nan.
Otro reunion importante cu Prome Minister lo tin durante su bishita na Hulanda ta un reunion cu e Minister di Relacion Exterior. Esaki mirando e impacto cu e situacion actual na Venezuela y e situacion di medida cu e Gobierno nobo di Merca a tuma riba e refugiadonan di otro pais, lo por tin riba pais Aruba.
Banda di tur e reunionnan aki, Prome Minister tambe a haya un invitacion pa atende e di 400 aniversario di e Universidad di Leiden. Esaki sigur ta un momento hopi special, mirando cu su persona a studia na e Universidad aki. Tambe e lo asisti varios reunion na Arubahuis.
“E lo ta un paar di dia basta carga cu reunionnan pero cada un ta importante pa asina mantene e relacionnan den Reino manera semper mi a haci den e ultimo 7 añanan. E reunionnan aki tambe ta importante mirando cu ta duna espacio pa por adresa e crisisnan cu tin rond mundo y cu di un of otro manera ta afecta pais Aruba”, Prome Minister a expresa.
