ORANJESTAD – Aruba ta e prome isla den Reino Hulandes cu a logra cera su dump y transiciona na un sistema di maneho di desperdicio mas responsabel, posicionando como un modelo pa sigui.
default
Den e contexto aki, delegacion di Sint Maarten ta na Aruba, dirigi door di Minister di Vivienda Publico, Medio Ambiente y Infrastructura, Sr. Patrice Gumbs. E delegacion lo conoce mas di cerca e transformacion aki y explora solucionnan cu por ta aplicabel na nan situacion na Sint Maarten.
E ciere di dump Parkietenbos a marca un comienso nobo den maneho di desperdicio di Aruba. Un paso cu mester a wordo tuma hopi aña atras mirando e dump tabata operando riba su capacidad pa decadas caba, y extremadamente dañino pa salud publico y medio ambiente. Hopi Gobierno anterior a duna di conoce nan intencion di cera esaki, pero no a logra. Probablemente paso e no tabata un decision popular. Esaki ta unda bienestar di Aruba mester a lidera e decision y no decisionnan populista. Un decision cu ful Aruba por ta di acuerdo cu tabata necesario, pero specialmente esnan cu ta biba den vecindario, cu tabata sufri di e consecuencia di e cero toxico y huma preto na Parkietenbos.
Pa logra esaki diferente startegia clave a wordo implementa, entre nan:
- Redireccion di desperdicio pa reduci e cantidad cu tabata yega dump.
- Tin cu menciona cu ya for di 2018, Serlimar mes no tabata tira desperdicio residencial of comercial na Parkietenbos mas, sino hiba na Ecotech pa wordo procesa, un acuerdo di Gobierno di e tempo ey.
- Impulsa un sector di procesa desperdicio, creando oportunidad pa empresanan di reciclahe y sostenbilidad.
- Desaoryo di strategianan a largo plaso, basa riba data di pasado y actual.
- Fortalecemento di cumplimento y control, incluyendo medida pa duna boet ora tira sushi ilegal, esaki ainda ta den proceso mirando cu ta rekeri cooperacion di husticia.
E problema di maneho iresponsabel di desperdicio ta un desafio di hopi decada na Aruba. Prome cu a cuminsa cu e transformacion aki, Na 2012 segun e rapport di Cero Tolerancia a identifica 62 plot habri, cual 31 tabata wordo uza como dump ilegal, awe nan ta 6. DNM ta monitoreando nan y e siguiente paso ta pa hunto cu BCI atende cu nan. Esaki ta demostra cu maneho di desperdicio no ta solamente un asunto di infrastructura, sino tambe di un cambio cultural y di comportacion den comunidad.
A pesar di e avancenan, e transicion no a tuma luga sin desafio. Resistencia politico, incluso acto di tira sushi clandestino den anochi, y e implementacion di medidanan di control y cumplimento tabata rekeri un esfuerso considerabel. Sinembargo, a traves di Bureau City Inspector (BCI), esfuerso a wordo intensifica pa combati e praticanan ilegal aki y reforsa conciencia ambiental den e comunidad. Awe, tin mas control social, reportando actividad ilegal di dump pa proteha nos isla di esnan cu no ta demostra amor pa Aruba. Danki na e vigilancia di e pueblo, instancianan relevante por tuma accion rapido contra e irresponsabilidad di tira desperdicio ilegalmente. Paso caminda di hiba desperdicio tin, mas informacion riba limpi.aw .
Aruba ta riba e rumbo pa transiciona na un economia circular, promoviendo e principio di reduci, reuza y recicla. E planificacion di un Milieupark (Parke Ambiental) ta den proceso. Aruba for di basta aña tabata merece un centro clave pa procesamento di desperdicio y recuperacion di recurso. Sinembargo, pueblo mester ta consciente cu soluciona un problema di mas cu 70 aña no ta un asunto di paar di aña. E continuidad di e vision lo depende di compromiso di e proximo gobierno pa mantene e mesun boluntad politico pa sigui avansa cu solucionnan responsabel basa riba data, considerando semper e bienestar di pueblo, planeta y prosperidad.
Ademas, actualmente un estudio ta wordo realisa den colaboracion cu Universidad di Georgia pa analisa comportamento di ciudadano den relacion cu maneho di desperdicio. Esaki lo contribui na mehora strategianan implementa, specialmente separacion.
Riba e caminda pa un Aruba mas limpi, sector publico y priva tin un rol crucial. Ainda tin retonan pa soluciona, como amplia e orario di centronan di procesamento di desperdicio riba weekend. Esaki mester wordo atendi den colaboracion cu e sector publico y priva.
E delegacion di Sint Maarten lo tin e oportunidad pa conoce detayadamente tur e iniciativanan aki y tambe comparti conocemento cu e ekipo di Aruba. E intercambio di experiencia no solamente lo fortifica cooperacion entre islanan di Caribe, sino tambe lo permiti pa avansa colectivamente den implementacion di solucionnan sostenibel y responsabel pa maneho di desperdicio den e region.
