ARUBA- 04.02.2025. Seccion di Gele Koorts Muskiet bestrijding (GKMB) di Departamento di Salud Publico ta alerta comunidad cu actualmente nan ta encontra masha hopi casnan cu criadero di sangura. Esaki ta causa cu e populacion di sangura ta hopi halto y esaki ta causa molester y trece peliger pa nos comunidad. Controlnan efectua den diferente bario rond di Aruba ta indica cu e problema aki ta presente den tur districtonan di Aruba.
Departamento di Salud Publico ta haci un yamado na comunidad pa tuma accion y tira un bista rond di bo cas of espacio unda ta biba y bolter tur awa cu ta keda para despues di yobida. Of den caso cu ta acumula awa pa cualkier proposito, mester tapa y cuida e awa aki bon pa evita cu eta bira un criadero di sangura.
Aumento grandi den populacion di sangura riba nos isla ta nifica peliger pa brote di malesanan transmiti pa sangura manera entre otro Dengue, Zika y Chikungunya. Reduccion di e populacion di sangura ta rekeri accion di nos cada uno como ciudadano di pais Aruba pa yuda duna un man. Seccion di GKMB so no por controla tur cas riba Aruba y mirando e cantidad di yobida diario e ta rekeri control regular rond di cas pa awa cu ta keda para.
Pa algun aña caba seccion di GKMB ta implementando un maneho pa cu cuido y proteccion di nos flora y fauna y no ta core rond spuit barionan mas cu veneno, cu exepcion si tin casonan positivo di malesa transmiti pa sangura den e area. E maneho di antes unda tawata core rond spuit veneno alabes no ta uno efectivo mirando cu tanten cu tin awa para rond di casnan e sanguranan lo sigui broei.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na [email protected]
14
