Na Horacio Oduber Hospital (HOH), nos ta kere cu inspiracion ta cuminsa na un edad hoben y cu curiosidad ta e base di innovacion. Pa e motibo aki, nos ta focus constantemente riba forma nobo y innovativo pa empodera e proximo generacion di doctor, enfermero y cientificonan—y e biaha, nos a haya e forma unico pa logra esaki pa medio di donacion di microscoop di calidad halto na scolnan basico local.
E microscoop aki cu ta ultra moderno, y tabata wordo uza pa nos nos profesionalnan di LabHOH cu recien a wordo accredita pa tur disciplina, a yuda nos profesionalnan haci hopi diagnostico crucial. Awo, e microscoop lo tin un proposito nobo y emocionante, pues pa lanta curiosidad, stimula y crea pasion bou di studiantenan hoben na Aruba den loke ta e mundo di ciencia.
HOH no ta bay solamente haci donacion di ekipo, pero banda di esey ta duna bida tambe na ciencia. Como parti di e bunita iniciativa aki, un analista di laboratorio di LabHOH lo bishita cada scol participante pa brinda un curso interactivo na e maestro(nan) tocante uzo di e microscoop y e mundo fascinante di microbiologia. Cu experiencia practico aki, nos ta duna studiante desde un edad hoben un bista den e maraviyanan scondi di ciencia.
“Na HOH, nos no ta solamente compromete na ofrece cuido di salud di calidad, pero tambe nos ta compromete pa inspira e futuro generacion di profesionalnan den cuido medico. Cu e donacion di e microscoopnan aki y ofreciendo cursonan interactivo, nos ta spera di logra planta e simia di pasion pa loke ta ciencia den e mente di nos hobennan. Como parti di nos responsabilidad social como organisacion tambe nos ta yuda nos comunidad, cu ta cuadra cu nos vision y alabes nos meta pa cu medio ambiente, social y maneho ,” segun Gregory Croeze, miembro di Hunta di Directiva di HOH.
E prome tres scolnan cu a ricibi donacion di dos microscoop cada uno ta Scol Primario Kudawecha, Reina Beatrix School y Scol Basico Xander Bogaerts. Cu e iniciativa aki, HOH ta busca pa cera e brug entre teoria y ciencia den bida real, sigurando cu studiante desde chikito por mira, explora y soña. Nos ta spera di asina por inspira e cientificonan y profesionalnan medico di mañan di Aruba.
