E grito pa responsabilisacion y transparencia ta mas fuerte cu nunca

ORANJESTAD – Dia 31 di januari 2025 Algemene Rekenkamer a publica e Rapport Onderzoek Jaarrekening 2019 Land Aruba den cuadro di su tarea constitucional.

Algemene Rekenkamer a investiga si e ehecucion di e presupuesto na aña 2019 a tuma lugar segun ley y e reglanan financiero-administrativo. Tambe a investiga e desaroyonan di e maneho financiero y realisacion di e meta pa yega na sostenibilidad di finansas publico. Algemene Rekenkamer a ricibi e version definitivo di e cuenta anual 2019 na september 2024. Esaki como cu despues di un investigacion di Algemene Rekenkamer, a haci algun coreccion den e version cu a entrega anteriormente na november 2023.

Responsabilisacion (accountability) brinda door di e Pais den forma di un cuenta anual ta un condicion pa transparencia, di bon gobernacion y ta esencial pa yega na finansas publico sostenibel. E hecho cu ainda no a duna responsabilisacion completo di e gabinete anterior ta algo lamentabel. Con por garantisa derecho presupuestario di Parlamento si ta aproba un presupuesto sin cu a duna responsabilisacion di e uzo di e fondonan of si a logra e metanan di e aña anterior?

E consecuencia di no a finalisa e plannan di mehoracion di maneho financiero den forma determina ta claramente visibel. E investigacion ta mustra cu te na e momentonan aki no a enfoca riba mehoracion structural di e maneho financiero ni di duna cuenta door di entrega un cuenta anual adecuado na tempo. Si lesa e rapportnan di Algemene Rekenkamer di siglo pasa, ta evidente cu e deficiencianan cu a señala e tempo ey ainda ta existi. Esaki no por sigui di e forma aki mas, ni tampoco por acept’e mas.

Algemene Rekenkamer ta conclui cu riba diferente nivel presupuestario, a surpasa e fondo aproba cu por clasifica como ilegitimo. Ta birando un custumber cu ta surpasa e presupuestonan sin autorisacion previo di Parlamento. Otorgamento di fondonan cu aprobacion di Parlamento sin cu ta existi un base legal pa esaki, of sin cu ta percura pa regla esaki tambe ta un practica cu ta tumando luga pa hopi aña caba. Algemene Rekenkamer ta indica den su rapport cu e meta principal pa introduci normanan presupuestario ta pa logra finansas publico sostenibel. Pero e investigacion ta mustra cu e normanan presupuestario a bira un meta riba su mes. E forma inconsistente di administra sin duna splicacion ta pone cu e cuenta anual di 2019 ta carece di transparencia. Tampoco ta hustifica debidamente e resultado financiero locual ta crea un bista eroneo.

Cu e rapport aki Algemene Rekenkamer ta desea di contribui pa haci transparencia y responsabilisacion na tempo un condicion indispensabel. Mester logra cu esaki ta bira, sin excepcion algun, algo automatico denter di un ciclo presupuestario, cu tin como resultado e realisacion di finansas publico sostenibel.

E rapport di Algemene Rekenkamer, conteniendo e resultado, conclusionnan, recomendacionnan, reaccion di minister di Finansas, como tambe e epilogo di Algemene Rekenkamer ta disponibel via www.rekenkamer.aw.