Oranjestad, Aruba – 28 di januari 2025 – Aruba Airport Authority N.V. (AAA), e entidad encarga cu e maneho y operacion di Aeropuerto Internacional Reina Beatrix (AIRB), ta emiti un ultimo yamada pa e companianan di consultancy y e contratistanan experencia pa expresa nan interes pa sostene e team Development & Technology (DevTech) di aeropuerto of bira eligibel pa haci trabou di contratacion general pa e companianan “third-party” cu ta opera riba e tereno di aeropuerto.
E team DevTech di aeropuerto ta supervisa e proyectonan di infrastructura, mantencion di facilidad y mehoracion di sistema di aeropuerto, di e manera aki garantisando un servicio sigur, eficiente y di calidad halto pa e pasaheronan y pa e stakeholdernan. Originalmente a emiti e Request for Expression of Interest (REOI) dia 10 di december 2024, mirando cu fecha final 31 di januari 2025 ya caba ta acercando rapidamente, AAA ta tuma e oportunidad pa urgi e companianan y e profesionalnan interesa pa entrega nan Request for Expression of Interest (REOI) pa garantisa cu ta tene nan den consideracion.
E Request for Expression of Interest (REOI) ta invita persona y compania cualifica pa presenta propuesta den e siguiente categorianan:
- Servicio di consultancy: Nos ta en busca di experto den ingenieria y diseño, Surveying & Testing, maneho y planificacion di proyecto y otro terenonan relaciona cu desaroyo, construccion, mantencion y renobacion di e instalacionnan.
- Servicio di contratista: Nos kier yama bonbini na e companianan cu ta brinda servicio di contratista general pa proyectonan di gran escala y tambe tareanan mas chikito manera trabou di verf, mantencion mas chikito y demas modificacionnan di menor escala. E contratistanan mester compromete nan mes na brinda solucion di calidad halto, sigur y eficiente.
E Request for Expression of Interest (REOI) ta representa un oportunidad pa colabora den e proyectonan cu lo mehora e funcionalidad, aspecto visual y sostenibilidad di nos facilidadnan.
Pa detaye di e rekisitonan y informacion adicional tocante e REOI aki, por bishita: www.airportaruba.com/requests-for-offers
E fecha final pa entrega ta dia 31 di januari 2025. Ta curasha tur esnan interesa pa entrega nan propuesta prome cu e fecha pa garantisa su consideracion.
Tocante AUA Airport Tocante AUA Airport AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na mas cu 3 miyon pasahero pa aña y brindando
servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 76% ta di Merca y Canada, 16% ta di Latino America, 5% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.
