Oranjestad, 28 Januari 2025 – Diabierna 24 Januari a tuma lugar loting di Kavels pa Carnaval 71.
Tabata tin un total di 217 Kavels di cual 81 lo wordo otorga na Vondellaan y 136 ta na L.G. Smith Boulevard. Tambe tin Vent Kavels disponibel: Noord tin 6 kavels, Oranjestad tin 7 y San Nicolaas tin 11.
E sorteo a ser realisa y controla pa Notario Sra.Hilda Rodriguez-Taekema y su team, garantisando transparencia y cu e proceso a cana conforme e ley estableci. Na e momento cu Notario ta saca e ganadornan di Kavels, e ta controla e validez di e peticion, entre otro check si e peticion tin un stampia, check si e peticion a wordo yena completo, corecto y firma y si e peticion a wordo hinca den e buzon corecto. Si e peticion wordo saca y e no ta cumpli cu e rekisitonan menciona, e peticion ta wordo conta invalido. Si un persona su peticion a sali mas cu un biaha, e prome so ta conta, y e resto ta wordo descarta. Ningun persona por haya mas cu un Kavel.
Siguiente pasonan:
- Ganadornan lo haya yamada: Notario a entrega e procesverbaal na DIP cu e lista di ganadornan di Kavel. DIP lo cuminsa yama e ganadornan entrante diaranson 29 Januari. Ta pidi pa por favor tur peticionarionan keda pendiente di e telefon.
- Documento y pago: Una bes cu ganadornan di Kavel haya yamada di DIP, e mester presenta cu un copia di ID valido y persoonsnummer na DIP personalmente of por entrega esaki via email na [email protected] . Si e documento nan aki ta in orde, e persona lo ricibi un factura pa procede na haci e pago corespondiente.
- Ricibi precariovergunning: Asina cu e pago wordo realisa, DIP lo yama e persona pa traha un afspraak pa pasa busca su precariovergunning pa Kavel na DIP.
Nota importante
Si bo persona a gana un Kavel y NO ta interesa pa uz’e mas, por favor entrega esaki bek na DIP. Den e caso aki lo otorga e Kavel aki na e siguiente persona riba lista di Reserve. Tene cuente cu NO ta permiti pa bende bo precarioverguning. E ta castigabel pa ley.
