Willemstad, Korsou:
Dia 28 di desèmber 2024 alrededor di 02.00’or, a tuma lugá un kiebro na e ofisina di e kompania di aviashon Z-Air situá na F.D. Rooseveltweg 80.
Den e mardugá ei, tres hòmber relativamente hóben, a kibra un bentana di glas na e parti
dilanti di e ofisina i penetrá den e edifísio.
E malechornan a bai ku un montante di mas ku 50 mil florin. Riba imágennan di kámara, por a tuma nota di un vehíkulo koló kòrá i tambe un Mitsubishi
Montero koló kòrá, ku probablemente e trio a hasi uso di dje pa yega na e sitio. E kompania Z-Air a pone un montante di 10 mil florin pa esun(nan) ku por duna e tep di oro ku lo kondusí na solushon di e kaso aki.
Pa duna informashon tokante di e kaso, por yama únikamente riba e number 108 (liña
anónimo di Kuerpo Polisial Kòrsou).
Kuerpo Polisial ta gradisí bo di antemano pa bo koperashon i ta spera ku bo kontribushon lo yuda nos pa mas pronto posibel detené esnan sospechoso den e kaso aki.
Riba e video ku nos ta publika athunto, por tuma nota di e trio ku a kometé e kiebro.
