- Bill Said ta keda apuntá ademas di su ròl aktual di Managing Director tambe komo Group Head
- Cris van Kempen ta djòin komo Managing Director i Chief Risk Officer
- Michael de Sola a tuma e desishon pa después di 15 aña retirá di Banko
Willemstad, Kòrsou, 23 di yanüari 2025 – Maduro & Curiel’s Bank (MCB) ta anunsiá ku Bill Said, aktual miembro di Hunta di Maneho, ta keda apuntá ademas di su ròl aktual di Managing Director, tambe komo Group Head entrante 1 di mei 2025. Den e posishon akí e lo asumí e responsabilidatnan di e área di negoshi di Michael de Sola, ku a tuma e desishon di retirá for di banko después di 15 aña den MCB su Hunta di Maneho. Michael ta keda na disposishon di banko, mientras esaki ta nesesario den 2025 pa sigurá un transishon fásil. Además, Cris van Kempen, ku pa e último 5 añanan ta Chief Risk Officer di MCB, lo djòin e Hunta di Maneho di MCB entrante 1 di yüli 2025.
Lionel (Chicu) Capriles II, Presidente i CEO di MCB, ta respetá Michael su desishon kompletamente. “Michael tin un trayektoria largu den nos Hunta di Maneho i su kontribushon ta eminente. Na nòmber di nos tur na MCB, mi ta yama Michael masha danki pa su kontribushon asina signifikante i mi ta apresiá ku e lo keda disponibel durante e aña akí pa garantisá un bon transishon. Bill ta den nos Hunta di Maneho ya pa 2 aña i a yuda nos banko logra mas. Su enfoke fuerte riba eksperiensia di kliente i konosementu di práktikanan internashonal lo yuda sirbi banko i nos klientenan mihó. P’ami ta un plaser tambe ku Cris lo djòin nos Hunta di Maneho, sigurando asina ku ekspertisio den riesgo ta bon representá den nos tim di liderazgo. Ku tantu Bill komo Cris den nos Hunta di Maneho i nan konosementu di nos banko i nos komunidat, esaki ta sigurá kontinuidat fuerte.”
Den un splikashon di su desishon, Michael ta bisa: “Mi tabatin un temporada fantástiko na MCB, ku koleganan tremendo i klientenan fiel. Después di 15 aña, awor mi ke eksplorá otro retonan pafó di banko. MCB ta den un bon posishon, pues mi por hasi e kambio aki den transkurso di aña ku pas mental”.
Bill Said ta añadí: “MCB ta hopi aktivo den nos ekonomia lokal i Chicu, Michael i ami ta kompletamente riba e mesun liña den komprondé e importansia di banko pa nos komunidat. Ta un honor pa sirbi banko, su klientenan i otronan konserní i mi ta spera di por kontinuá i ekspandé nos relashonnan fuerte riba tur e islanan ku nos ta sirbi.”
Cris van Kempen ta komentá: “Ta un previlegio pa mi djòin e Hunta di Maneho di un banko ku asina un historia fuerte i ku un ròl asina importante den nos komunidat. Mi ta spera di por sigui traha ku mi koleganan pa nos keda fortalesé nos éksito i sigui kontribuí na stabilidat i kresementu di nos banko.
Nombramentu di Cris van Kempen den e Hunta di Maneho ta manera kustumber suheto na aprobashon di reguladó i di akshonistanan.
E proseso pa un susesor komo Presidente i CEO nobo ta kana según skema. Na mart 2024, Chicu a anunsiá ku e lo retirá na 2025. E Hunta di Komisario mesora a inisiá e proseso pa haña un susesor i esaki ta kana manera planiá.
Prioridat di e Hunta di Komisario ta pa sigurá kontinuidat den e Hunta di Maneho, manteniendo e tradishon largu di stabilidat, ekselensia i servisio di Banko.
