Ban celebra e legado y impacto positivo cu Betico a laga tras riba nos pais
ORANJESTAD— Diasabra 25 di januari, Aruba ta celebra Dia di Betico. Esaki ta e fecha natal di nos gran Libertador Gilberto Françios ‘Betico Croes’. Betico Croes tawata e Lider visionario y Tata di nos Status Aparte. Su lucha sin limite y liderazgo a habri caminda pa autonomia di Aruba den Reino Hulandes. Cu su determinacion, a forma e futuro di nos pais y a inspira generacion tras di generacion pa nunca laga nos bandera cay.
Koffiemorgen y cuminsa crioyo
Partido MEP, diasabra venidero na Cede di MEP, lo celebra e legado di e gran luchado aki di nos pais y e impacto cu el a laga tras riba nos pais di generacion pa generacion. For di 10’or di mainta lo tin Koffiemorgen unda cu por sinta paden den tur trankilidad mientras ta disfruta un mainta ameno cu famia y amistadnan. Tambe lo tin tentnan pafo unda lo bende dushi cuminda crioyo te 3’or di atardi.
T-shirt conmemorativo di Betico Croes
Riba e dia aki tambe por probecha e oportunidad pa cumpra e t-shirt conmemorativo di Betico Croes mientras cu tin disponibel. E t-shirtnan ta obtenibel den Size S,M,L y XL pa AFL20,- y Size 2 Xl y 3 XL pa 25,-. Esaki ta un bunita recuerdo y desde awo caba por reserva via Telefoon/Whastapp 5936677. Cantidad ta limita.
Un Dia Pa Disfruta Hunto!
Bin pasa un rato dushi cu bo famia y amigonan bou di tremendo musica pa alegra e ambiente. Celebra Dia di Betico. Celebra su impacto den nos comuminidad. Celebra e union y progreso cu Betico semper a inspira den cada Arubiano. Un biaha mas, ta e sentimento patriotico aki, di orguyo, gratitud, union y speransa nobo, Partido MEP kier logra treciendo pueblo hunto riba Dia di Betico. Ban hunto honra nos historia.
