Bernhardstraat – Diasabra marduga pasa di 3’or y mey polis a bay altura di Carnaval Village, unda un auto a perde control y drenta mondi.
ALGUN RATO PROME
Na e sitio nos por a compronde cu e vehiculo aki ta un Kia Rio y cu algun rato prome e mesun auto aki tawata envolvi den pustamento cu un otro auto.
Na e sitio por a scucha hende ta papia cu un di e autonan den e pustamente tawata luz paga.
Agentenan cu a yega mesora a pidi pa ambulance cu urgencia, mirando con e chauffeur hoben tawata den e auto.
Paramediconan cu a yega algun minuut despues, no por a haci mucho pa sake y mester a pidi pa brandweer pa yega y yuda.
Mester bisa cu a dura un poco, prome cu a saca e chauffeur. Nan a logra sake y por a mira cu nan a pone boca abou ariba e brancard.
Prome cu e la wordo hinca den e ambulance nan a bir’e bek boca ariba y unda cu mesora a sali cu ne strit Hospitaal.
E momento ey e hoben J.D tawata for di tino ora cu nan a bay cu ne.
Mirando e seriedad di e accidente aki, a notifica tur e departamentonan concerni cu a yega tambe na e sitio. Manera hefe di departamento di trafico y tambe hefe di districto 3 cu ta San Nicolas y algun mas.
Na e sitio vocero di polis Sra. Rasmijn a bisa cu e hoben chauffeur su estado ta critico, door di golpinan ricibi.
