ORANJESTAD – Awe mainta pa oranan largo a trata e lamentable caso di accidente fatal, caminda e homber Jeferson Lopez (28) a perde su bida. Fiscal a exigi 4 aña di prison y 5 aña sin rijbewijs pa e chofer cu a ocasiona e accidente fatal riba14 Mei 2024, Javier Tejedor Perez Tejedor (64).
ARUBA NATIVE por a compronde cu famia di e victima Lopez a hiba palabra den Corte y a haci expresionnan fuerte.
FAMIA DI VICTIMA A PAPIA
Aña pasa a introduci e ley Penal nobo caminda awor den casonan penal, ta permiti e victima of famia di e victima hiba palabra den Corte. Esey a sosode ayera tambe caminda e señora viuda di Lopez, e ruman muher di Lopez y e mama di Lopez a hiba palabra.
E señora viuda di Lopez tabata presente pero no tabata sinti capaz pa papia. El a duna abogado mr. Emerencia su declaracion pa lesa pa Hues. Mr. Emerencia a lesa cu ta inhumano loke nos a pasa aden. Bo por perde bo trabao y bo por spera un trabao. Ora bo perde bo bida, bo no tin nada mas. Hendenan bou influencia ta mata hende y laga famia cu tristeza. Despues di algun aña, nan ta liber. Un cos ta cu nos mester ta bon cu otro pasobra nos no sa e dia cu nos ta bay. E dia cu nos bay, nos tin cu duna cuenta na Dios.
E ruman muher di e victima tambe a papia. El a expresa cu e kier un punto final na e caso. El a cuminsa yora y a bisa cu e kier husticia pa loke a pasa. El a bisa cu e no ta bisiña di J.P.T. E no conoce J.P.T. cu ta un ilegal. El a kibra tur ley di trafico. Maneha auto bou influencia di alcohol. E daño cu J.P.T. a causa, ta inpagabel. No tin nada pa recomenza e bida di mi ruman. Laga e caso aki concientiza tur alcoholico pa busca ayudo.
