ORANJESTAD – Awe mainta den sala di Corte, por poco situacion a bay completamente for di man. Na dado momento dos miembro di famia y tata di e victima di tira mata, Sharuri Petronia a lanta bay riba e abogado di e acusado Principaal.
Aruba NATIVE por a compronde cu door cu e abogado a haci cierto expresion di su cliente, e famia di e victima no a gusta y a lanta pa bay confronta e abogado. Un miembro di CEA y dos miembro di KIA a actua pa evita un confrontacion formal entre tata y famia di e victima Sharuri Petronia y e abogado di e acusado Principaal.
HOF MESTER CORIGI SENTENCIA
Awe Hof a trata e decision di Corte Supremo riba e sentencia di Hof contra Principaal, condena pa riba 4 Juni 2021 a tira Sharuri Petronia (19) mata den e cas caminda Principaal tabata keda na San Nicolas.
Ta asina cu Corte den Promer Instancia a usa e ley di adulto contra Principaal (17) y a conden’e na 9 aña di prison. E sentencia a wordo apela y Hof despues di tratamento di e caso, a usa e ley hubentil contra Principaal y a conden’e na 4 aña di prison y tambe pa tratamento obligatorio den un instituto. E sentencia aki tambe a wordo apela y Corte Supremo na Hulanda a haya cu Principaal ta culpabel di a tira mata Sharury Petrona pero cu e castigo cu Hof a duna no ta corecto. Hof no por duna castigo di prison y banda di esey tambe tratamento obligatorio den un instituto. Corte Supremo a ordena Hof di Corte Superior pa drecha e sentencia.
FAMIA A LANTA CONTRA ABOGADO
Durante tratamento di e caso, abogado mr. Kock, di Principaal, a hiba palabra. Den sala di Corte tambe tata presente tata y famia di e victima Petronia. Tambe tabata presente e mama di Principaal. E abogado a haci cierto expression cu a pone e famia di e victima rabia. E abogado a bisa Hof cu e ta garantiza Hof cu Principaal no ta un asesino. Manera e abogado a expresa esey, e tata y famia di e victima Petronia a cuminsa reclama den voz halto. Nan a lanta para y zwaai man den direccion di e abogado mustrando cu Principaal a tira Sharuri mata.
MIEMBRONAN DI CEA Y KIA A ACTUA
E tata, tabata masha hopi rabia y tabata reclama e abogado formal. E famia tambe a cuminsa reclama y tur a cuminsa cana bay den direccion di e abogado. Di biaha por a mira cu un miembro di CEA y dos cuidador di preso di KIA a actua. Un miembro di CEA y un miembro di KIA a cana bay riba e famia mientras cu e otro miembro di KIA a bay para dilanti e abogado, cara pa e famia cu tabata bay riba e abogado. E miembro di KIA a indica na e abogado pa e keda keto, mientras cu e otro dos miembronan a tene e famia y calma nan. E tres Huesnan cu ta forma Hof, Procurador General, Griffier a keda sinta tras di e mesa berde mira kico ta pasando. E traductor cu tabata sinta banda di Principaal, a lanta para y hala un banda. No a dura mucho cu e miembro di CEA y e dos miembronan di KIA tabatin e situacion bou di control.
