Recientemente a tuma lugar e lansamento di e di 3 edicion di e campaña di conscientisacion pa mayor y educador titula “Carnaval Safe pa tur Mucha y Hoben”. E campaña aki ta organisa door di e Comision Vision Pedagogico, cu ta consisti di 5 organisacion; Tienda di Educacion, Stichting Wit Gele Kruis, Departamento di Asunto Social, Fundacion pa Nos Muchanan y Fundacion Respeta Mi den colaboracion cu Universidad di Aruba su departamento di Social Work & Development.
E campaña tin como meta pa presenta y trece conscientisacion riba 7 punto pa mayor (nan) tocante con pa tene mucha(nan) safe durante Carnaval como tambe 7 punto pa mayor(nan) con pa tene hoben(nan) safe durante Carnaval.
E campaña aki tin 4 diferente area di concentracion cu ta; trece conscientisacion riba plataformanan social, workshops pa e sector publico y priva, un jingle/video cu un mensahe directo pa mayornan como tambe e presencia di e comision na varios eventonan di carnaval pa asina reparti e flyer cu e 14 diferente puntonan como tambe pa brinda conseho y sosten na tur presente. Cada area tin nan propio actividad nan pa asina yega na e meta di conscientisa mayornan y dunadonan di cuido di e importancia di nos muchanan y hobennan safety durante periodo di Carnaval.
E campaña di Carnaval 71 aki ta conta cu e sosten financiero di WEB Aruba N.V. como tambe CEDE Aruba cu a yuda cubri e gastonan pa asina haci esaki posibel. Un danki special na nan como tambe tur otro organisacion y departamento presente cu ta sostene e campaña di conscientisacion aki pa duna nos muchanan y hobennan e oportunidad pa disfruta di Carnaval 71 na un manera safe. Nos ta reconoce cu e rol di mayor ta sumamente importante y p’esey kier sostene mayornan den nan tarea.
Por ultimo un danki special na SMAC cu tambe a duna su sosten pa nos por ta presente na varios eventonan di Carnaval pa asina por hiba e mensahe na nos comunidad.
E team completo kier a encurasha tur mayor y educador pa participa y apoya e campaña di conscientisacion aki pa asina hunto nos por tene nos muchanan y hobennan safe durante Carnaval 71.
Ban hunto contribui na un Carnaval safe pa tur nos muchanan y hobennan aki na Aruba.
