Nos ta reuni awe pa rindi un homenahe y respet na Jan Hendrik Albert “Henny” Eman, cu tabata un persona importante den e historia politico y desaroyo di Pais Aruba. Henny Eman a nace dia 20 di maart 1948 denter di un famia politico cu a funda e partido cristian democrata AVP. Henny a continua cu e compromiso familiar y a lidera e partido AVP y Pais Aruba na varios ocasion.
Na momento cu Aruba a logra Status Aparte dia 1 di januari 1986, Henny Eman a bay den historia di Aruba como e prome Minister-President di un Aruba autonomo. Su liderato durante e periodo ey tabata enfoca riba stabilisa y reanima economia di Aruba despues cu e refineria di LAGO a cera.
Henny a sirbi den tres termino como Minister-President di Pais Aruba, durante añanan 1986 pa 1989 y dos biaha durante di añanan 1994 pa 2001. Tambe Henny tabatin un rol significante den Parlamento di Aruba den oposicion. Durante su carera politico, Henny a demostra su amor pa nos Pais, su fe den progreso y e tabatin un compromiso pa logra bienestar di Pais Aruba.
Den e ultimo etapa di su bida, Henny a dedica su tempo pa guia y prepara e generacion nobo di lidernan di e partido AVP. Henny a wordo reconoci tambe na nivel internacional cu distincionnan di e Orden Francisco de Miranda di Venezuela y Officier in de Orde van de Nederlandse Leeuw di Hulanda.
Den nomber di Gobierno di Aruba, como gobernante y como politico nos ta reconoce y duna credito na un persona cu a dedica gran parti di su bida na desaroyo politico na Aruba formando parti di e diferente institutonan democratico di Pais Aruba.
Ser un gobernante den funcion y special den un Pais chikito tin su retonan, sacrificio y ta tuma hopi energia y boluntad di esnan cu ta scohe pa haci esaki. Esaki ta conta mas aun pa un persona cu ta lider di un partido y cu a fungi na diferente ocasion como Minister President di Pais Aruba. Ta hopi esfuerso lidernan di partido tq haci pa mantene partido hunto, gobierno hunto y pueblo bon informa pa mustra un solo liña di maneho. Un trabou cu hopi biaha no ta wordo aprecia, pero ta un hecho cu mester tin hendenan dispuesto y cu ta scohe pa hasi e trabou aki.
Apesar cu Henny a sali di un famia cu un trayectoria politico, e como persona, mester a tuma un decision dado momento di continua riba e caminda di sirbi su Pais. Poniendo su mes asina na disposicion di e Pueblo di Aruba. Pa esaki den nomber di Gobierno di Aruba nos kier a gradici su persona pa e dedicacion y trabou aki na bienestar di Pais Aruba.
Un danki tambe ta bay na su famia cu a permiti y a sostene Henny durante e añanan den su funcion politico na Aruba.
Dia 6 di januari 2025, Henny Eman a fayece na edad di 76 aña. Su trabou, contribucion y legado lo keda semper como un parti importante den historia di Pais Aruba.
