Nos tey bek! Un feliz y saludabel 2025 pa un y tur! Bon bini bek na mi editorial, mi nomber ta Dasha y mi ta un boticario na Botica di Servicio.
Un aña nobo ta e momento pa reflecciona y pone bon proposito. Porta bo kier haci mas deporte, come mas saludabel of baha man na sigaria. Pero cuanto hende ta pensa riba un new year’s resolution hopi simpel pero mesun importante: sigui bo tratamento di remedi manera prescribi? E ora ta awo pa cambia esaki!
Imagina bo ta sali for di un cita cu bo dokter cu un receta specialmente adapta pa bo salud. E idea ta simpel: tuma e remedi manera prescribi pa bo sinti miho of pa preveni mas daño na e curpa. Pero hopi hende no ta sigui esaki! Algun hende ta stop ora nan sinti nan mihor aunke e ta un remedi cu mester tuma pa resto di e persona su bida pa preveni daño, otro tin miedo pa efecto secundario, of tin ta simplemente lubida di tuma nan remedi. Tur esaki por parse sin consecuencia, pero e realidad ta otro! Problema manera entre otro bacteria resistente door di uso incompleto di antibiotica of malesa di e ader nan door di falta di regularidad den tuma remedi pa preshon di sanger por bira un riesgo real.
Pa remedi traha, e mester wordo usa na e manera corecto. Esaki por mustra facil na prome instante, pero no tur ora esaki ta asina simpel. E dokter y e botica tin un rol importante pa splika kiko e remedi ta hasi, dicon e ta necesario, i kiko por pasa si bo no usa e remedi na e manera corecto. Na otro banda, e patient mester ta honesto tocante e obstaculo nan cu e ta enfrenta, manera lubida di tuma e remedi, efecto secundario cu e ta sinti, of duda den e terapia. Solucionan moderno, manera apps den telefon, cahanan special pa ordena e remedi of nos sistema di rol di medicina por yuda. Pero e base ta semper un bon comunicacion.
Remedi no ta un enemigo, pero un compañe den bo bida. Por supuesto, ta importante pa ta critico y bon informa. Pero e confiansa den e experencia y conocemento di bo dokter y boticario mester bai man na man cu esaki pa por mehora bo salud.
Si tin duda of preocupacion tocante bo remedi, no duda pa busca ayudo na bo dokter of boticario. Pidi claridad of support no ta un debilidad, pero un señal cu bo ta tuma responsabilidad pa bo bienestar!
Tumando bo remedi manera prescribi ta un accion chikito cu un impacto grandi riba bo bida. Asina ta, haci di 2025 e aña caminda bo no solamente ta pone bon proposito, pero tambe ta sigui nan. Bo salud y bo futuro ta merece esaki!
