‘Ronella Croes CEO di A.T.A. ta inicia e prome parada di Carnaval 71’
Cu gran honor, Aruba Tourism Authority (A.T.A.), como un di e sponsornan oficial di Carnaval, ta cende e mecha ceremonial pa asina inicia e promer actividad oficial di Carnaval 71. Esaki ta un papel prestigioso cu ta resalta e sosten continuo y reconocemento diparti di A.T.A. pa cu Carnaval. Un tradicion cu ta sirbi como un herencia cultural vibrante di nos isla.
Como parti di strategia general, A.T.A. ta duna hopi balor na eventonan social, cultural y recreativo, reconociendo nan como elemento vital pa mehora e experencia di tanto residente como nos huespednan. Según meta general turístico di A.T.A., Carnaval di Aruba ta ser considera como un dia eventonan cultural di mas grandi di nos isla. Un evento cu ta ofrece un experiencia unico cu ta provee s comunidad local un oportunidad pa demostra nan creatividad sin limite cu vestuario imaginativo y musica vibrante. Un evento cu ta uni e residente, mientras ta invita nos huespednan pa uni y promove un imagen positivo di e oferta cultural autentico di Aruba.
Cu e tipo di iniciativa aki, A.T.A. ta fortalece su compromiso pa percura cu tanto nos residente como nos huespednan por experiencia e rikesa di nos actividadnan cultural, algo cu ta amplifica nos identidad unico.
A.T.A. ta fungi como un promoter internacional pa Carnaval di Aruba desde su origen. Cu utilisacion di diferente canalnan di mercadeo, cu ta inclui feria y eventonan internacional. A.T.A. ta percura pa resalta e magia di Carnaval na e audiencia riba un nivel mundial, garantisando su reputacion como un di eventonan di mas importante pa e isla.
Sosten Continuo
Desde su establecimento na 2014, A.T.A. orguyosamente ta fungi como un patrocinador oficial di Carnival Stichting Maneho di Aruba Carnaval (SMAC). Prome cu SMAC, A.T.A. a percura pa duna sosten na organisacion na Carnaval via Stichting Arubaanse Carnaval (SAC). Ambos ta organisacionan cu a y ta cumpli cu criterianan importante di A.T.A. pa sigura transparencia y alineamento di e meta comparti. Esaki ta resulta den sosten financiero anual pa asina sigura Carnaval di Aruba.
Inversion Anual den Carnaval
Cada aña, A.T.A. ta inverti grandemente den Carnaval di Aruba, sostenendo varios aspecto, manera logistica y infraestructura, patrocinio di eventonan pa promove participacion local y huespednan. Campaña di mercadeo cu ta eleva e visibilidad di Carnaval internacionalmente. Esfuersonan colaborativo cu diferente organisacion local pa amplifica e narativa cultural di Aruba.
Cu inicia di Parada di Flambeu, A.T.A. keda comprometi y dedica na engrandece Carnaval di Aruba como un di e eventonan cultural di mas grandi pa e isla. Un feliz Carnaval 71. Gosa sanamente!
