ORANJESTAD – E hombernan Venezolano Y.R. y D.S. a presenta diabierna mainta den Corte pa scucha nan sentencia. Nan caso a wordo trata December 2024 caminda Fiscal a haya nan culpabel di ta envolvi den traficacion di hende caminda 4 hende a hoga. Fiscal a exigi 7 aña di prison pa cada un.
ARUBA NATIVE por a compronde cu Hues a haya Y.R. y D.S. culpabel y a condena Y.R. na 7 aña di prison mientras cu D.S. na 6 aña di prison.
Tratamento di e caso tabata na December 2024, caminda Fiscal ta acusa Y.R. y E.D.S. cu entre 1 December 2023 y 11 December 2023, a haci traficacion di hende y cu door di e hecho aki 4 hende a bin fayece riba laman.
SENTENCIA
Hues a bisa cu ambos ta wordo condena pa traficacion di hende caminda 4 hende a hoga. Hues ta haya cu di un forma of otro, Y.R. y D.S., a duna aporte significante pa e traficacion. Hues ta haya cu tin suficiente prueba cu Y.R. a manda placa y duna conseho cual tipo di boto mester busca. Tambe Hues ta haya cu Y.R. a percura pa hendenan na Venezuela wordo hiba na e boto pa bin Aruba. Hues ta haya cu D.S. a maneha e boto hunto cu un otro durante e trayectoria pa Aruba. Tambe cu D.S. tabata percura pa yena tanki di gasoline for di bari pa e boto por navega.
Hues a bisa cu e no ta haya cu nan tabatin intension pa kita bida di hende durante e traficacion. Hues a bisa cu tabatin peliger di morto durante e traficacion. Na opinion di Hues, for di e investigacion, no ta mustra cu e duo Y.R. y D.S., a haci e traficacion pa gana placa.
CULPABEL DI TRAFICACION
Hues a bisa cu e ta haya nan culpable di traficacion di hendenan. El a bisa cu e caso ta hopi serio door cu 4 persona a perde nan bida. Na opinion di Hues, traficacion di hende ta haci violacion grandi riba orden publico. Tambe e ta contra e maneho estableci pa Gobierno pa hendenan drenta Aruba. Hues ta haya cu door di esaki, ta mantene un cirquito di hendenan ilegal pa Aruba.
CASTIGO
Pa cu e castigo, Hues a bisa cu e ta tene cuenta cu seriedad di e caso y sentencianan cu sa duna pa casonan similar. Pa cu Y.R., Hues a tene cuenta cu su funcion den e organisacion di e viahe. Hues ta haya cu Y.R. a duna informacionnan valioso entre otro ki tipo di boto mester busca, busca un capitan y manda placa. Di otro banda, Hues a tene cuenta cu dos hende serca di Y.R. su famia, a fayece durante e viahe. Esaki a causa un impacto fuerte riba e famia.
Pa cu D.S., Hues ta haya cu D.S. a dicidi di bay cu e boto siendo cu e sa cu e boto no tabata apto pa haci e viahe y laman tabata bruto. Hues a bisa cu durante e viaha, D.S. tabata percura pa gasoline pa e motornan. Hues tambe a tene cuenta cu D.S. mes a forma parti di e viahe y a pone su mes tambe na peliger.
| ReplyForward |
