ORANJESTAD— “Ta un siman cu nos a ricibi e tristo noticia di fayecimento di sr. J.H. (Henny) Eman, ex Prome Ministro di Aruba. Den nomber di Gobierno di Aruba mi ta extende nos mas profundo condolencia na su famia, su sernan keri y henter e pueblo di Aruba cu e partida físico di e ex mandatario”, Prome Minister Evelyn Wever-Croes a expresa.
Como ex Prome Ministro sr. Eman a goberna Aruba na 3 oportunidad: entre 1986 pa 1989; entre 1994 pa 1997; y entre 1997 pa 2001. Sr. Eman tabata e prome Prome Minister di pais Aruba na momento cu Aruba a haya su Status Aparte.
ENTIERO DI ESTADO
Segun nos leynan actual, solamente un minister cu fayece den su funcion, ta ricibi un entiero di estado. Sinembargo, Minister President Evelyn Wever-Croes y Conseho di Minister, despues di a ricibi tur e consehonan necesario, a dicidi di cambia e ley, y pa otorga na sr. Henny Eman, como un ex Prome Minister, un entiero di estado.
Pa esaki ta extende un invitacion na comunidad pa acudi na e acto di entiero cu lo tuma luga dialuna 13 di januari 2025. E corteho funebre lo pasa dilanti Bestuurskantoor y Parlamento di Aruba, na unda Gobierno y Parlamento por mustra nan respet.
Tin oportunidad pa duna condolencia di 10:30 AM te 4.00 PM na Plaza Henny Eman, banda di Kabinet di Gobernador.
Ta haci un apelacion na doñonan di trabou den sector priva y sector publico pa coopera pa duna e oportunidad na empleadonan cu ta desea pa atende e entiero.
“Cu Dios duna famia- y amigonan di sr. Henny Eman, dfm, fortalesa y consuelo den e momentonan dificil aki”.
Evelyn Wever-Croes
Prome Minister
