ORANJESTAD – Diaranson 8 di Januari a tuma luga e huramentacion di e 21 miembro di Parlamento nobo sigui pa un reunion publico pa eligi e presidente y vice presidente di Parlamento. Lider di partido MEP Evelyn Wever-Croes como un di e miembronan nobo den Parlamento a indica cu partido MEP ta di opinion cu den e periodo transitorio cu no tin un Gobierno ainda, e presidencia mester bay pa partido FUTURO cu ta esun cu muy probablemente lo forma parti di e siguiente Gobierno.
Lider di partido MEP a indica cu e plannan tabata pa un persona di partido AVP bira presidente di Parlamento, pero den e caso cu partido AVP no logra forma cu FUTURO, e presidencia lo keda un di nan representante te cu september pa motibo cu no por baha un presidente den interim. Pa e motibo aki e tabata un bon decision pa henter parlamento para tras di e ponencia aki cu pa un bon gobernacion y funcionamento di Parlamento e presidencia ta den man di FUTURO.
Despues di e votacion cu 20 voto na fabor e presidencia a bay pa señora Gerlien Croes. Lider di partido MEP ta desea señora Gerlien Croes hopi exito cu e reto nobo aki. Vice presidente a keda den persona di señora Mervin Wyatt-Ras di partido AVP. Señora Wyatt-Ras lo ta esun cu lo reemplasa señora Gerlien Croes na e momentonan cu e no por ta presente.
Cu e resultado aki, e prome reunion ta tras di lomba y e siguiente reunion lo ta e reparticion di e representacion den e diferente comicionnan fiho di Parlamento y comicionnan special di Parlamento cu lo tuma luga mas sigur den e siguiente siman, y fraccion di MEP ta cla pa esaki tambe.
“Pa fraccion di MEP e ta un honor di por representa Aruba, y tur e votadornan. Pa mi persona e ta un honor di representa mi 6474 votadornan y pueblo en general y pa percura pa pais Aruba sigui riba e caminda di stabilidad, prosperidad y progreso. Nos compromiso ta cu pais Aruba y pa percura cu tur e trabounan grandi cu nos a haci den e ultimo 7 añanan y tur e logronan cu a wordo realisa no bay perdi” Lider di partido MEP a expresa.