E cambio fiscal aki ta trece alivio pa 21 mil hogar y 28 mil persona na Aruba
Diamars mainta Minister Maduro di Finansa compaña pa Minister President y ehecutivonan di Departamento di Impuesto, a tene un rueda di prensa den cual e mandatario a anuncia un rebaho grandi den e tarifa di impuesto riba entrada pa aña 2025.
Prome tarifa ta baha di 10% pa 0%
E mandatario di finansa a splica cu pa algun tempo caba tabata trahando riba e calculonan necesario pa asina por trece alivio fiscal pa comunidad y cu despues cu e analisis necesario a wordo haci, a yega e momento cu por anuncia un reduccion den e prome tarifa di loon- y inkomstenbelasting di 10% pa 0% pa aña 2025.
Alivio fiscal pa 21 mil hogar y 28 mil persona
Minister Maduro a splica cu e cambio fiscal aki ta trece alivio pa tur 21 mil hogar cu ta paga impuesto riba entrada. E mandatario a informa cu segun calculo den 12 mil hogar lo tin un total di 16 mil persona cu no lo mester paga inkomsten- of loonbelasting mas. Den 9 mil hogar lo tin 12 mil persona cu lo bay paga menos impuesto y esaki por significa un alivio di 3493 florin extra pa aña den nan cartera. Pues un total di 28 mil persona lo ricibi un alivio fiscal cu e cambio fiscal cu Minister Maduro di Finansa a anuncia y decreta diamars mainta.
