Aunke cu e sospechoso a desmenti categoricamente
ORANJESTAD — Awe mainta e E homber E. (46) a presenta den Corte pa e caso penal cu Ministerio Publico a cuminsa contra dje. E ta wordo acusa di a abusa di un mucha homber entre 2014 y 2017. E. ta un docente di deporte na un school.
ARUBA NATIVE por a compronde cu Fiscal ta haya E. culpabel y a exigi 6 aña di prison y tambe cu pa 11 aña, E. ta wordo prohibi di eherce su funcion di docente di deporte na cualkier school.
SOSPECHOSO TA NENGA
Den sala di Corte tabata presente e mayornan di e victima M. y familiarnan. Tambe por a mira familiarnan di e acusado.
Hues a puntra E., kico e ta pensa di e acusacionnan di Fiscal. E. a desmenti di pornografia di mucha y tambe di a mishi y abuso di M. Hues a mustra cu a haya E. cu diferente potret di muchanan. Segun E., el a saca potret di e muchanan homber sin t-shirt pasobra nan tabata train den calor. El a bisa cu un potret, caminda tin un mucha cu carson baha y su atras afor, el a screen shot y a mand’e pa e mucha pa hala su atencion. Hues a bisa cu E. ta un docente di deporte na school. Hues a bisa cu a papia cu un otro docente di deporte cu tambe ta duna les di deporte. E docente a bisa cu mester ta cauteloso con anda cu mucha. Hues a sigui puntra E. tocante e potretnan y si esakinan ta pa atrae E. sexual. E. a desmenti cu e potretnan ta atrae, sexual.
Hues a bisa cu e mama di M. a haci denuncia y kico E. ta pensa di e denuncia di e mama. E. a desmenti di a abusa di M.
Hues a bisa cu un persona cu tabata core pasantia na e school, a declara na KZP cu el a mira E. ta haci movecionnan sospechoso. El a mira E. a brasa un mucha di patras y a frega cu su parti intimo na e mucha. E. a desmenti esaki. El a bisa Hues, cu tin biaha e sa kraak muchanan su lomba y ta gara nan di patras pero ningun momento e ta frega riba e mucha.
Fiscal a mustra cu E. tabatin chat basta pisa riba sex cu un mucha homber. Segun E., tur esey tabata wega cu nan tabata haci. Segun E., eseynan no tabatin ningun balor sexual. Fiscal a remarca cu tabatin palabranan basta pisa cu ta duna e impresion cu nan lo kier tabatin relacion cu otro. Fiscal a mustra tambe cu E. tabatin un potret di un mucha den baño cu su parti intimo afor. E. a bisa cu el a bay saca e potret y net e momento ey, e mucha a haci asina.
Fiscal a mustra cu e mucha M. hasta a declara cu el a pensa di mata su mes. E. a bisa cu e ta haya hopi lamentable esey. El a sigui bisa cu e por a compronde cu tabatin problema familiar den famia di M. y cu e famia a dicidi di bay Hulanda. E. a bisa cu e no sa pakico M. a declara asina contra dje, siendo cu nada a pasa. El a bisa cu e ta un persona hopi familiar cu muchanan pero esey no ta conduci cu e ta bay abusa di mucha sexual.
MAMA DI VICTIMA KIER HUSTICIA
Mama di M. a hiba palabra den Corte. Por a nota cu e mama M. tabata hopi emociona. El a bisa cu te ainda su yiu ta afecta. E ultimo 11 luna tabata di angustia. Nan yiu a wordo afecta door di acto di E. E mucha tur dia mester lucha cu e angustia y problema psychico. Na yoramento el a bisa cu 4 biaha su yiu kier a mata su mes. E mama a bisa cu for di 2024 e mucha ta sufriendo y ta hayando tratamento psycologico. Por a nota cu mientras e mama tabata papia, su casa y otro miembronan di famia tambe tabata yora. E mama a pidi Hues pa tene cuenta cu tur e sufrimento aki y pa haci husticia pa su yiu y manda un señal bon cla den comunidad, cu no ta accepta esaki.
DEMANDA DI DAÑO
E mama a bisa Hues cu placa lo no drecha e situacion cu su yiu ta pasando aden. El a bisa cu e gastonan ta encera e pasashinan cu a cumpra pa bin for di Hulanda pa haci denuncia. E mama a splica cu, e aña aki su yiu ta haci 18 aña y e no ta cay mas bao di aseguro. Awor ta e mayornan mester bay paga. El a bisa cu psycologo kier interna M. den un clinica pa haya tratamento contra su ideanan pa mata curpa.
FISCAL
Fiscal a bisa cu e ta cita un frase cu el a topa den e documentonan. “Tur e añanan aki mi a pensa cu mi por a handle pero no a logra, E unico cos cu mi a pensa ta suicidio pa kita tur esaki”. Esaki ta expression di e victima M. Fiscal ta haya cu tin suficiente prueba cu E. a abusa di e mucha M. Fiscal ta haya e declaracion di M. ta confiabel. El a bisa cu e declaracion di M. ta consistente y hopi detaya. Di otro banda tin declaracion di E. cu ta desmenti categoricamente.
Fiscal a mustra cu na Maart 2024, M.(16) a purba mata su curpa. Door di actua liher y intervension medico, no a yega asina leu. E mama a cuminsa papia cu M. y a bin sali na cla cu M. a wordo abusa sexual door di E. Fiscal a bisa cu e victima M. a bisa cu e promer biaha cu e abuso a sosode tabata den e camber di cambia paña. El a bisa cu E. a drenta den e camber ora cu M. tabata eyden y a hinca man den carson di M. y mishi cun’e cu su dede y penetre. Tambe cu E. a mishi cu e parti intimo di M.
Por a mira cu e tata di M. y familiarnan tabata yora mientras cu Fiscal tabata bisa kico M. a declara.
Fiscal a mustra cu 30 Mei 2024, bou guia di Hues Comisario a bay haci investigacion na dos cas y a haya diferente computer cu a bay investiga. A haya potret di muchanan bou di 18 aña y ta considera esaki pornografia di mucha. Tin potret di un mucha cu su carson baha. Fiscal a bisa cu segun ley, tur esaki ta castigabel. Tambe el a mustra cu tin combersacionnan “chat” entre E. cu un mucha homber riba di16 aña caminda nan tabata papia amplio di tin relacion sexual.
Fiscal a expresa cu ni cuanto castigo duna, no lo kita kico a pasa cu M. Fiscal a exigi 6 aña di prison. Ademas, el a exigi pa prohibi pa E. sigui eherce su trabao como docente di deporte pa un periodo di 11 aña. Fiscal a pidi Hues pa aproba e demanda di gastonan material di viahe y estadia y e gasto inmaterial di 25 mil florin pa paga.
ABOGADO
Abogado mr. Illes a bisa Hues cu e no ta haya cu tin prueba legal y convicente.
E abogado ta haya cu tampoco tin prueba di sosten. E ta haya cu solamente tin declaracion di e mucha. El a remarca cu Polis a bay haci investigacion na e school pa wak si lo tin mas mucha cu a bira victima. No a haya nada. Esey ta haci cu ta solamente tin e declaracion di M. contra E.
E abogado a bisa Hues cu mester ta hopi cauteloso ora ta evalua e caso aki pasobra no tin suficiente prueba. E ta haya cu tin duda den e caso aki y pesey mester declara su cliente E. liber. El a bisa cu door cu mester declara E. liber, no por aproba e demanda di daño
| ReplyForward |
