Oranjestad-Aruba
Wardakosta Karibe Hulandes ayera a risibí un notifikashon ku un catamaran a haña problema riba laman, i ku
e tripulashon mester a bandoná e boto inmediatamente. E Sentro di Operashonnan Marítimo di Wardakosta
mesora a dirigí e avion di patruyahe di Wardakosta pa e ubikashon spesifiká pa kontrolá kiko a sosedé. Una
bes ku a yega na e lokalidat, mas o ménos 150 mia nortwèst di Aruba, e tripulashon di e avion Dash a mira
ku e personanan den laman tabata drif riba un asina yama ‘ life raft’, un tipo di vlòt di reskate, pasobra nan
catamaran tabata senk. E helikòpter di Wardakosta ya tabata na kaminda pa bai asistí e kuater hòmbernan.
Pa por a tene e ‘life raft’ na bista, kual tabata drif riba laman, e avion patruyero di Wardakosta a keda na e
lokalidat pa monitoria e situashon. Na momento ku e helikòpter a yega na e ‘life raft’ esaki a hisa i saka e
kuater hòmbernan for di e ‘life raft’ i pone nan den e helikòpter. E hòmbernan a yega Kòrsou seif i nan a ser
translada na immigrashon ku lo sigui atende e kaso di e personan aki. Entretantu e Sentro di Operashonnan
Marítimo di Wardakosta a manda un mensahe via di NAVTEX pa informá botonan den bisendario di e catamaran Second Wind ku a senk pa nan tene kuenta ku esaki riba laman.
