ORANJESTAD– E Parlamento nobo lo huramenta diaranson 8 di januari 2025. Den e Eleccion di dia 6 di december 2024, 21 persona a wordo eligi pa forma parti di e Parlamento. Pa Fraccion di MEP lo huramenta:
Evelyn Wever-Croes
Dangui Oduber
Xiomara Maduro
Endy Croes
Rocco Tjon
Hendrik Tevreden
Edgard Vrolijk
Shailiny Tromp-Lee
Mientras tanto e formacion di gobierno ta sigui den proceso. 4 Parlamentario di MEP lo ocupa dos cargo simultaneamente desde diaranson 8 di januari, Evelyn Wever-Croes, Dangui Oduber, Xiomara Maduro y Rocco Tjon lo sigui den e cargo di minister demisionario tanten cu no tin un gobierno nobo huramenta, y lo ocupa tambe e cargo di parlamentario. Pa e trabounan aki nan lo ricibi un salario so.
Un parlamentario por tin e cargo di minister tambe pa un periodo di maximo 3 luna. Si pa 8 di april no tin un gobierno nobo ainda, nan lo mester tuma un decision cual cargo nan lo sigui cu ne.
Mester remarca cu e 8 parlamentarionan di MEP ta politiconan cu hopi experiencia y conocemento y lo hiba un politica fuerte. Lo sostene tur locual ta bon pa Aruba, pero lo ta critico tambe contra tur locual no ta bon pa Aruba, sea ta desde coalicion of oposicion. Semper poniendo e ciudadano di Aruba na prome luga.