Shiribana – Bispo di aña atardi rond di 3’or y 45 polis a bay cu urgencia altura di Domino’s Pizza na Shiribana, pa un accidente entre brommer cu un Toyota Yaris.
Polis motorisa cu a yega a pidi pa ambulance debi cu e motociclista tawata ariba caminda drumi y no tawata comunica verbalmente.
Na e sitio chauffeur di e Yaris a conta cu e la subi e caminda druk, momento cu un auto a dun’e chance pa subi. Aki ta unda e brommer a bin dal contra e parti dilanti basta duro y e motociclista a keda benta banda di e brommer.
Trafico a stagna debi cu e momento eynan tawata tin hopi trafico ariba caya.
Polis di trafico a sigui protocol y a laga e dama chauffeur supla o sea a usa e Alco-Sensor. Tur cos tawata ok, debi cu e dama a caba di labora.
Ambulance a presenta y mesora e Paramediconan a baha e brancard y por a mira nan yuda e motociclista lanta y subi e cama, pa despues transport’e pa Hospitaal.
