Aeropuerto di Aruba ta orguyuso pa anuncia e nominacion den e categoria sumamente competitivo “Under 4 Million Passengers” pa Routes Americas Awards 2025. E reconocemento aki ta destaca e logronan sobresaliente di Aeropuerto di Aruba den desaroyo di ruta, asociacionnan cu companianan di aviacion y su esfuersonan continuo pa mehora e experiencia di pasahero.
Routes Americas Awards ta entre e premionan mas respeta den e industria di aviacion y ta celebra e aeropuertonan y e destinacionnan cu ta demostra excelencia den e desaroyo di servicionan aereo y e rendimento di e rutanan. Pa por ta preselecciona den e categoria prestigioso aki ta refleha e iniciativanan strategico di Aeropuerto di Aruba pa expande conexion y fomenta relacionnan valioso cu e aerolineanan.
“Nos ta sinti honra pa ta reconoci entre e aeropuertonan lider den region. E nominacion aki ta refleha nos compromiso firme cu e crecemento, innovacion y e colaboracion di nos aerolineanan asocia”, asina Jo-Anne Arends, Aviation Business Development Executive na Aeropuerto di Aruba, a enfatisa. El a continua bisando cu: “E esfuersonan di nos team pa fortalece e conexion aereo di Aruba ta impulsa pa nos obhetivo di ofrece experiencia di biahe sin problema y sostene e desaroyo economico di nos isla”.
E enfoke di Aeropuerto di Aruba riba desaroyo di diferente ruta strategico y asociacionnan a conduci na e adicion di rutanan nobo, aumento di frecuencia di vuelo y conexionnan mas fuerte cu e mercadonan di fuente clave. E programa di expansion di e aeropuerto “Gateway 2030” tambe ta demostra su vision pa crecemento a largo plaso y mehora e experiencia di e pasahero.
Lo anuncia e ganadonan di Routes Americas Awards 2025 na e forum di Routes Americas 2025, cu lo tuma luga na Nassau & Paradise Island, Bahamas, di 10 pa 12 di februari 2025. Como e evento di desaroyo di servicio aereo lider den e region, e forum ta trece hunto un cantidad di profesionalnan den e industria di aerolineanan, aeropuertonan y destinacionnan, brindando un plataforma strategico pa construi relacionnan di gran balor cu esnan clave encarga pa tuma desicion den desaroyo di servicio aereo.
E nominacion di Aeropuerto di Aruba ta enfatisa su rol como actor clave den e paisahe di aviacion regional y su compromiso continuo cu excelencia.
Tocante AUA Airport Tocante AUA Airport AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando
servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 76% ta di Merca y Canada, 16% ta di Latino America, 5% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.